【識生又識教！】學霸星二代檢閱 佢哋啲仔女都係叻叻豬！
近年唔少星二代都決心向娛樂圈發展，因為佢哋唔多唔少，都遺傳咗父母嘅靚人基因同埋演藝才華。不過星二代好多都唔係得個樣，讀書叻嘅亦都大有人在，本身係學霸級數嘅，亦都唔少！一齊睇吓有邊幾個！
撰文：Sunday Kiss 圖片：新傳媒資料室、梁芷珊Facebook 專頁、湯君慈、湯君耀IG、TVB、龔慈恩微博、
林愷鈴IG、何猷君、何超盈IG，網上圖片
羅樂桐生日送厚禮畀媽咪
8月30 號係梁芷珊囡囡羅樂桐Eily16歲嘅生日，但係媽咪未同個女慶祝，囡囡就先送上厚禮！皆因Eily今年考IGCSE（即係類似香港當年嘅會考），考獲11A嘅佳績！梁芷珊為囡囡感到高興之餘，亦都覺得好安慰！
即刻同羅生報喜
知道成績後，梁芷珊都有即刻同羅生報喜，恭喜佢「我哋再一次不勞而穫！」有呢個講法，係因為佢哋從來冇Push過個女去做任何嘢。梁芷珊話，「值得開心既係，我終於可以用事實來證明，小朋友讀書學習係唔駛迫既，開心快樂成長最緊要，絕對唔駛報十間幼稚園，唔駛補習，唔駛學芭蕾舞，唔需要學七國語言。」
青梅竹馬好友係IB狀元
同日，Eily同一個由細玩到大嘅男仔朋友一齊慶祝，因為呢個朋友仔，今年考IB考到45分滿分，係今年嘅IB狀元！