【果欄情報】爽脆香甜！當造塔斯曼尼亞車厘子！4大人氣品牌＋教你級數分真假！
早前才剛吃完日本士多啤梨，未夠一個月，果欄又有當造水果上場。今次輪到澳洲塔斯曼尼亞車厘子！每年12月尾至2月出場，憑著大粒、爽脆、濃甜，成為人氣熱賣。近日不少塔斯曼尼亞車厘子品牌陸續到港，貨源和價錢漸漸穩定，Fans們可以出手入貨了。今次就去果欄找齊4款品牌，兼搵專家教你車厘子點分品種、點分真假！
撰文：ning 攝影：Man、Fion、網上圖片
延伸閱讀：
【韓國手信】平價國民品牌「No Brand」 超市 20 大必掃零食、朱古力
點解塔斯曼尼亞車厘子咁出名？
食過塔斯曼尼亞車厘子的人都知道，它的價錢相當矜貴，原箱購買，平均起碼$500一盒，比起美國、智利的車厘子，價錢足足高幾班。點解咁貴？因為塔斯曼尼亞位於澳洲南部，遠離澳洲本島，變相土壤、水質污染比較少，氣候溫和，種出來的車厘子品質優良，更是冠絕全球的車厘子品種。
即睇4大塔斯曼尼亞車厘子品牌
講起塔斯曼尼亞車厘子，你會聽到好多關鍵字，「43度」、「紅寶石」、「金袋鼠」⋯⋯聽到一頭煙唔知係乜？其實這些都是當地數個塔斯曼尼亞車厘子的人氣品牌，學識咗就知點揀！
1.43° South
人稱「43度」，最為香港人熟悉的品牌。雖然去年曾經爆出有不法商人疑似平價收購其紙盒，或用舊款包裝盒，將其他產地車厘子混入，偽裝成塔斯曼尼亞車厘子出售，造成風波，但其肉質香甜，皮脆肉厚的特點，依然都有不少擁躉。
2.Reid Fruits 金袋鼠
因為盒子上的袋鼠圖案，又被稱為「金袋鼠」，農場位於塔斯曼尼亞南部Derwent Valley，有160年歷史。車厘子以汁多、味濃見稱。
3.T.R Tasman Ruby 紅寶石
港人稱之為「紅寶石」、「紅鑽」，由當地Lucaston Park Orchards農場出品，世代經營。特徵是肉厚核細，口感實淨爽脆，甜而多汁，暫時為今年品質最佳，行內預期會大賣。
4.Somercotes 金雀
果欄行內稱為「金雀」，坊間比較少見，來自塔斯曼尼亞中部小鎮Ross的農場，冬夏季冷熱分明，雨量適中，車厘子較少受氣候變化影響，品質上相對較穩定，同樣肉甜、爽脆Juicy，價錢也暫時是眾牌子之中最平。
塔斯曼尼亞車厘子 品種級數點分？
咁多塔斯曼尼亞車厘子品牌，究竟邊種最好味？問過欄商，得到的答案竟然係：「好難講，一個品牌，可能今個月唔好食，隔一、兩星期再買又會變番好食」，原來是因為車厘子還要根據出產時期，按質感、形狀、味道分成不同品種級數。
認住以下幾款印在盒上的車厘子品種（Variety)「字頭」，購買時就能一擊即中，找到自己喜歡的車厘子！
最初期：Van、Kordia
代表最初上場的車厘子批次，味道較淡，質感也相對軟腍，未夠爽脆。
第二期：Stella
普遍於一月初出產，形狀偏細粒，果肉亦會帶酸，口感同樣未夠結實。
最好食：Lapin
大約於一月中見市，外形最靚，呈飽滿的心形，味道濃郁香甜，口感好，咬落脆卜卜。
車厘子點樣揀？
話晒都是天價車厘子，當然要買得嚴謹！揀完牌子、再揀品種，仲要開箱Check貨，等欄商教你點樣為之新鮮車厘子。
1.看果椗
正宗的塔斯曼尼亞車厘子，果椗一般都非常修長，並以翠綠色為新鮮；果椗也不能脫落，否則鮮度便會大減。
2.無裂縫
整粒車厘子必須光滑無裂痕，如有像圖中的裂開部分，代表該顆車厘子受損，容易發霉變壞。
3.無皺皮
原盒買入的車厘子，如有小量凹陷為正常現象；但如果凹陷之餘，外皮變皺，輕按該位置時質感軟腍，則代表車厘子不夠新鮮，開始變壞。