政Whats噏：陳沛良口誤　錯將「主席」稱「主人」

喺莊嚴嘅議事堂內，議員發言不時都出現口誤。繼議員梁美芬、洪雯喺早前先後錯將「主席」稱為「主人」，隔咗一排同樣嘅「蝦碌」事件就輪到議員陳沛良！

正如日本經典動漫對白「人類總要重複同樣的錯誤」，今日(8日)陳沛良就檢討公共財政政策嘅議員議案而發表意見，本來都就嚟講完啦，但當佢嘅陳詞去到尾聲，竟然口快快咁叫咗立法會主席梁君彥做「主人」。

不過，包括梁君彥在內嘅在席議員，似乎聽到都無咩反應，如果梁好似上次內會主席咁忍唔住笑出嚟，情況都會幾尷尬。但其實梁都有前科，曾將議員簡慧敏誤稱為周慧敏，可能大家都有機會鬧笑話。梁感同身受先至無反應啫。

東網網站 : https://on.cc/東網Facebook專頁 : https://www.facebook.com/onccnews/