《再見 試當真》

試當真喺啱啱星期日完成歷史任務，光榮地退場。嚟緊等我簡單總括佢地五年間嘅高低，再講下自己感受，在此好好道別。

「教友戰友老友女友說個笑話說再見 喊了痛了醉了說了再見讓往事如煙」

五年轉眼過去，試當真開台無耐就爆紅，喺疫情時期經常引起全城熱話，好似四台聯播、《Channel需要女》、一週年show，《係咁先啦》更加成為家喻戶曉嘅歌曲，風頭一時無兩，冒起之快喺香港YouTube界相當罕有。

疫情過後，縱然熱潮稍退，仍然產出唔少成功嘅創作。《今際之國》系列緊湊刺激，鬥智鬥力，留下唔少經典場面；《公開試當真》帶大家回到中學時代，重新感受公開試嘅壓力。

仲有《同囚易》，特別係執笠前最後一集，明明只係成班人一齊做啲好普通嘅野，但已經勁有趣；最後《墨魚遊戲2/3》更引嚟鋪天蓋地嘅討論，稱得上係近年香港最佳嘅YouTube片。首尾呼應，開咗個好頭，亦好好地完結。

「我最愛美到了最尾燕尾服也是最美 到這葬禮似去派對拍照代替紀念碑」

試當真五年間貫徹依個招牌嘅精神，做過嘅新嘗試多不勝數。

試玩毛投入巨量資源同心思，有唔少都稱得上係世界級製作，規模同精彩程度絕對可以媲美全盛時期嘅running man。仲有多元化又具特色嘅試映劇場、每週嘅謝票場、不同類型紀錄片、校花校草，甚至成員陸續出廣東歌，到最後舉辦嘅短片比賽，更比創作人們一個被看見嘅機會。佢地做過嘅突破不能盡錄，除咗定期為觀眾帶嚟娛樂，亦為影視界帶嚟一大班新血。

此外，試當真舉辦唔少線下活動，好似一週年show、實謝、白金像獎，配上海量嘅會員片，同觀眾距離拉得好近，成功聚集到一班非常忠實嘅fans，可以話行咗一條前無古人嘅道路。

「活得精彩結尾切勿流眼淚 來讓我詩歌班裡悄然沉睡這是自然程序」

試當真雖然嘗試咗好多，但受到嘅批評，甚至攻擊都唔少，好似游學修嘅言論、NFT事件，都導致佢地成為輿論焦點，引嚟不少hater。加上試當真嘅創作，好似部分試映劇場，同埋一啲比較小眾嘅企劃，確實唔太易入口。縱然死忠依舊支持，仍然改變唔到街客逐漸流失嘅事實。去到近年，佢地不論view數同話題都比頭兩年跌咗唔少，但規模就大咗好多，變相難以支撐。

最尾一條live同執笠紀錄片都比大家睇到佢地內部嘅問題，以及台前幕後嘅suffer，其實成員們都係愛大家，愛個channel先會咁肉緊。因此，就算結束一定唔係最完滿，但會係最合適嘅結局。

「開心的派對 散後無法聚 我於燭光裡 祝福一句句 都心滿意足」

做咗一輪總結，再講少少個人感受。我唔算係試當真忠實fans，不過大部分片都有睇。坦白講唔係條條啱我口味，有時仲會睇到一頭霧水，但我依舊非常欣賞佢地嘅試驗精神，依班人總能夠拍出令人意想不到嘅橋段，細想又會有啲深度同message帶得走。啱啱嘅《墨魚遊戲》2同3直頭令我歎為觀止，翻睇咗幾次，又係咁睇大家嘅comment同BTS，仲聽曬兩集謝票場，好耐無試過對一個綜藝咁著迷。喺依個越嚟越速食嘅世界，佢地嘅創作更顯珍貴，所以要結束我係覺得好可惜，但亦明白依個決定。多謝你地五年間為香港YouTube界帶嚟一份新衝擊。

「若一天你活得很累 紀念我過去 為人如此風趣 風趣」

最後，講講香港創作類YouTuber面對嘅問題。

相比體育、時事、遊戲依類channel，佢地有固定嘅新素材，亦比較易聚集到對相關題材有興趣嘅觀眾，自然能夠長做長有。

而創作類YouTuber，好聽啲講可以天馬行空地創作，咩都拍得，但亦代表幾乎每條片都要由零開始，質素自然好難維持，觀眾要求亦只會不斷上升。拍類似嘅野會比人話悶，試新野又未必捉到大眾口味，最慘係當有幾條片流量麻麻，或者有排出少咗片，就會被演算法無情地懲罰，創作壓力實在太大。同時面臨reels嘅挑戰，仲有惡劣嘅經濟大環境，要平衡創作同賺錢變得非常困難。

詳情我會推介大家睇100毛最近兩集《國家級高峰會》，幾位老闆講得非常深入。

「新的工作裡 一追再去追 未開出最後的花蕊 你別要氣餒」

試當真結束難免令人不捨，好似象徵一個時代嘅終結。不過，試當真從來都係一個載體，依班人唔會一下子消失，佢地只係換種形式，繼續帶歡樂比觀眾，未來亦定會有人接棒。我相信香港YouTuber仍然有佢地嘅價值同生存空間。

試當真，有緣再會。

▼Follow hkpopculturelover
Instagram: https://www.instagram.com/hkpopculturelover/