娛圈單打︱又一花美男崩壞　不瘦降難以擊敗

嗚呼哀哉！繼長腿Oppa李敏鎬肥腫難分男神崩壞後，又一韓劇花美男逃不過「不瘦降」之謎！《愛情的溫度》、《我的女神室友斗娜》男主角、32歲嘅梁世宗，一直被譽為韓劇界「怪物新人」，主演劇集叫好叫座。點不知，佢最近出席新劇發布會，一張俊臉竟然闊咗唔止一倍，直情肥到眼都矇埋！媽呀，先生你邊位呀？

曾獲「大長金」李英愛盛讚表現出色嘅梁世宗，過去主演唔少韓劇，清新俊朗外表俘獲女觀眾芳心，好似《雖然30但仍17》、《愛情的溫度》都係代表作。之但係，佢日前出席新劇《下流大盜》發布會，外形竟然起了翻天覆地嘅變化，肥到阿媽都唔認得！

為配合角色造型，梁世宗首次以攣毛髮型示眾，咁都唔緊要，最駭人係佢塊面圓揼揼，肥嘟嘟，條Jawline唔知去咗邊，甚至肥到雙眼都被擠成一條縫！係就係好趣致，但家陣係韓劇男主角喎，咁嘅款，得唔得㗎？

答案梗係唔得啦！在場記者固然嚇親，網民更加直呼唔認得！猶記得，梁世宗2020年入伍，短短一個月有軍裝照流出，當時已經肥到豬頭咁樣，同幕前判若兩人。究竟係軍隊伙食太好，定係唔使出鏡放飛自我，眾說紛紜。之不過，以韓國整容術咁出名，大家都相信，只要退伍後搵醫生執一執，回復舊觀話咁易，好可惜，凡事總有例外。

梁世宗退伍後跟女神秀智合演《我的女神室友斗娜》，當時已被外界批評塊面腫腫哋，但萬沒想到，家陣塊面腫得更誇張！係咪唔記得打針咋？快啲做吓醫美，再控制吓飲食啦，否則遲早冇得撈呀！

東網網站 : https://on.cc/東網Facebook專頁 : https://www.facebook.com/onccnews/