戴祖儀遭冒充行騙　呃粉絲6千見面費

網絡詐騙猖獗，網上曾先後出現冒牌麥明詩及杜德偉等招搖撞騙。無綫小花戴祖儀早前亦不幸被騙徒假冒身份，更聲稱可以「付費見面」，她得悉後立即發文澄清，提醒粉絲不要誤墮騙局！

網上騙案層出不窮，視后李佳芯與劉佩玥等都曾被不法之徒冒名開設社交平台，近日輪到戴祖儀（Joey）中招，她接受本報獨家訪問講述事件，坦言不時獲朋友告知網上有人假冒其身份招搖撞騙，她說：「我本身覺得大家幫手去封鎖就算，我就冇特別Po出嚟，因為我覺得佢哋都冇做啲乜，但直至有人聯絡我經理人，話佢細佬畀人呃，有人扮我同佢傾偈傾咗一段時間，又叫佢嚟Event支持我，佢細佬就信以為真。」

Joey指騙徒獲取對方弟弟信任後即露出真面目：「去到後期就呃佢細佬，話過數畀6千蚊就可以同我見面，因為本身細佬冇錢所以冇過數。」得知事態嚴重，她立即於社交網發文提醒粉絲不要受騙：「我唔知其他人有冇遇到呢個情況。」

望獲另一半寵成公主

另外Joey昨日出席活動，跟小朋友一起製作飲品和傳統點心，更直言很喜歡小朋友，問她何時自己生一個？她笑謂：「都要有另一半先！」又透露近年有很多朋友介紹男士給她，但她性格比較慢熱，暫時仍屬單身，希望找到很愛錫自己的男朋友：「我身邊啲朋友嘅老公都寵到佢哋好似公主咁，至於外貌隨緣，不過最好有1米8高。」

Joey表示早前與吳若希及麥玲玲拍節目時曬黑了不少，但預告會趁暑假向粉絲大派福利圖：「絕對有泳衣嘅，因為嚟緊節目有新嘗試，以前我係保守派，今次終於唔係潛水衣上陣。」

東網網站 : https://on.cc/東網Facebook專頁 : https://www.facebook.com/onccnews/