章尾而自爆為MV練習高難度動作時整傷

歌手方皓玟師妹章尾而（Jamie）為無綫娛樂新聞台節目《StarTalk》任嘉賓，大談推出新歌《Falling》感受，身兼該曲MV導演的她，透露當時創作該曲時，腦海已湧現MV畫面：「一定要着高踭鞋跳舞，同埋一定要有水。本身都有學跳舞，但係唔叻，今次要苦練，我冇諗過咁難，因為好多落地嘅動作，初初練習時冇帶護膝，搞到膝頭哥同埋尾龍骨都瘀晒。拍攝當日天氣好凍，得13度仲要落水，但為咗效果靚，通常都要咁辛苦。」

談到去年為師姐方皓玟任紅館個唱嘉賓，Jamie說：「本身我自薦做和音，最後竟然變咗做嘉賓，收到通知後好緊張，我一緊張腦就會空白，所以日日喺屋企死練爛練，練到倒轉都識背。當上到台嘅時候，我冇諗過師姐嘅粉絲開晒手機嘅燈，佢哋未必識我係邊個，但我帶住都聽到佢哋為我打拍子、揮手，我覺得好感動同Sweet。」

東網網站 : https://on.cc/東網Facebook專頁 : https://www.facebook.com/onccnews/