羅馬被升班馬熱拿亞大炒4比1 摩連奴急於反攻招致大敗

意甲快車週中賽事，熱拿亞主場鬥首都狼羅馬，熱拿亞今日擺出5-3-2陣式，由古蒙臣(Albert Gudmundsson)同列迪古(Mateo Retegui)打雙箭頭，羅馬方面強陣出擊，3-4-2-1陣式由柏利迪斯同基斯坦迪打雙防中，希望拿下球隊三連勝🐺

上半場縱使羅馬擁有較多控球權，控制節奏，但係5分鐘熱拿亞一記反擊，古蒙臣禁區頂一撥一射入網，門將柏捷斯奧(Rui Patricio)落地反應相當之慢導致失球。雖然客隊係22分鐘作出回應，左翼衛史賓拿索拉落底一cup再傳中，基斯坦迪冇人看管下後上頭槌頂入追平1比1，但係臨完半場前，45分鐘列迪古禁區內接應科士比(Morten Thorsby)橫傳，左腳一𢭃右腳即抽射，為熱拿亞再度領先二比一，此子登陸意甲6場聯賽交出3記入球，能力值得留意👀

下半場羅馬戰績上再冇空間退讓，為左反攻抽起一名中堅，換入多一位中鋒比洛堤(Andrea Belotti)，形成四後衛圍攻對手，然而主隊下半場起全軍退守禁區，羅馬無計可施，更係74分鐘一次角球攻勢，科士比門前接應二傳頭鎚頂入，熱拿亞拉開比分到3比1。摩連奴係最後關頭將所有進攻球員都換上，包括阿斯蒙(Sardar Azmoun)、艾沙拉維(Stephan El Shaarawy)同艾奧亞(Houssem Aouar)，場上足足有四位前鋒🥵但反而全攻陣令陣容極度拉闊，81分鐘熱拿亞反擊，梅斯亞斯(Junior Messias)伏兵尾處射成4比1，最終羅馬作客被升班馬熱拿亞大炒4比1，羅馬6場聯賽只有1勝🥹

下半場嘅調動其實係有邏輯解讀，前場球員亦有質素，只係中後場嘅表現令人失望，門將逐漸不復當年勇，後防鬆散、中場未能好好組織，因此今場大敗係整隊嘅責任。最後領隊摩連奴接受訪問時都不忘讚吓自己：「事實上今季開季戰績係對於羅馬同我作為領隊最差嘅紀錄，但同樣係我執教前，羅馬未曾連續參與歐洲賽決賽都係事實。」

▼Follow 足球港場

Instagram: https://www.instagram.com/footballarena_hk/