粉絲帶黑膠封套索簽名疑被遺失　杜德偉親派杜太處理再多送新專輯

杜德偉一連兩場《GET UP 世界巡迴演唱會—香港站》於日前（10月19日）在紅館圓滿落幕。有杜德偉粉絲在社交平台發帖文，透露日前本來帶隻黑膠封套給杜德偉簽名，有個女性工作人員表示可幫手交給杜德偉簽名，但他一直等不到回覆，致電給該工作人員卻被cut線，正當他打定輸數「去二手市場買過隻算數」，竟然收到杜德偉本尊親自回覆，更派了最信任的杜太親自處理，「已經幫你搵返隻封套喇」。

以NEO自稱的網民在10月20日於threads發文，寫道：「昨日去杜德偉演唱會會場諗住帶隻黑膠封套畀杜德偉簽名，有個女性嘅crew 話會幫手拎嘢畀杜德偉簽名，畀佢拎咗之後，我由昨日下晝4點幾等到午夜12點幾，我打電話問返嗰個crew 攞返個封套佢就cut 我線，最後當然拎唔返，經過今次嘅經歷之後真係連啲工作人員都唔可以信，我懷疑佢掉咗我封套落垃圾筒，最後而家得返隻碟冇咗個套，之後再去二手市場買過隻算數，費事再追佢。」

網民NEO的帖文發出大半日後，引來杜德偉本尊回覆：「Hello我喺杜德偉本人，首先多謝你支持先。睇到你個post我已經立刻派咗我最信任嘅杜太親自處理呢件事，佢已經幫你搵返隻封套喇。現在得力助手會幫我取回隻封套，然後我會喺上面簽名再附送埋我最新嘅「Get up」專輯連簽名，希望你開心返啦。想問吓個簽名使唔使To邊個呀？」。

杜德偉之後貼出兩張簽名專輯的照片，寫道：「使命必達」。而網民NEO亦再發文：「最新情況：而家已經拎得返個紙套了，杜德偉本人亦已經簽名，同埋有最新專輯，呢件事可以完滿解決，多謝大家關注同幫忙，感激萬分。」不少網民大讚杜德偉親民「有禮貌、有交帶」、「杜德偉真係有道德」、「抵杜德偉紅咁多年」……