周永恒未離婚扮單身　落疊女星認蠢咗

藝人周永恒（Roy）日前在港鐵車廂攬太太陳薇（Britni）的親暱照爆光後，聲稱被Roy追求的前女子組合MVG成員周曉彤（Ivy）突然在網上現身數臭男方多宗罪，而Ivy接受訪問時，在多番追問下，終坦承和相識10、20年的Roy曾是短暫情侶關係，由去年9月開始至今年1月份共拍了4個月拖，Roy曾承諾娶她。

她說：「其實Roy未同前妻阿Yu（趙頌茹）結婚前已經追求過我，佢啲前妻、前度我全部都識，雖然當時我冇接受佢，但佢仲同我講如果我40歲未結婚就同佢一齊，直至佢再同Britni離婚，佢話佢老婆畀綠帽佢戴，冇家庭溫暖，又冇人幫佢湊仔，我見小朋友咁可憐，咪同佢湊吓小朋友，佢上次喺啟德Busking，我都在場幫佢湊仔，之後拍咗拖，因為我唔鍾意見報，所以我冇講出嚟，但好多朋友碰見過我哋。」

雖然是情侶，但Ivy強調和Roy沒有肉體關係，因她和Roy約法三章：「一星期見一次，同埋唔會同居。」又指至去年12月時，發現Roy「好恐怖」，令她提出分手達「一百次」，她再爆：「Roy當街鬧我，我都唔出聲忍佢，但佢跟蹤同要挾我，威脅到我人身安全，搞到我好驚，佢整傷自己又屈我傷佢，我報過好多次案，當執法人員嚟到時，佢又扮冇嘢，同埋佢一時話離咗婚，之後又話搞梗離婚，全部都係呃我，係佢一直煩住我，我當初信佢係我蠢。」問及Roy似乎尚未正式離婚，她表示：「我唔會做第三者，不過佢就要挾我，要爆料畀傳媒話我係『小三』。」

至於Roy除承認和Britni在分居期間，曾和Ivy發展戀情外，兩人分手的原因並非如Ivy所指控：「我婚姻狀況一早講晒佢聽，連Britni同我個仔都識佢，我夠膽講就算我一腳踏幾多船又點？我唔需要瞞佢、呃佢，我亦唔係明星，只係一個運輸工人。（點解分手？）性格不合囉，最後一次分手係因為我要去傾組織一個女圑嘅嘢，佢就嬲，仲掟晒我啲行李出街，連音樂理想都阻止我，覺得唔可以再勉強一齊，我哋分手、復合咗好多次，之前我追番佢，可能因為咁佢就覺得我跟蹤佢啦，今次我冇再箍煲，同埋又見到我同老婆張相，佢就咁樣囉；講到報案，如果我真係犯法，我唔信啲執法人員唔拉我、唔告我囉，不過我同Ivy都有過好開心嘅日子，唔想抹黑佢，仲要多謝佢曾經相愛。」

至於他和Britni尚未正式離婚，被指再涉「婚姻出軌」？Roy自感非公眾人物，毋須公開私隱，況且：「我都唔識法律，要問吓律師，我係咪已經離婚，同公眾無關，我只係個普通人，小角色，多謝大家咁關心我，請留空間我，我同Britni將來係點，連我自己都未知喎。」

東網網站 : https://on.cc/東網Facebook專頁 : https://www.facebook.com/onccnews/