東拿利禁賽10月後復出 紐卡素聯賽盃十二碼淘汰森林

聯賽盃第二圈賽事，諾定咸森林對紐卡素，兩支英超球隊對壘，兩隊同樣喺英超錄得一勝一和嘅戰績，今日主隊嘅森林3-4-3陣式有多名新援上演地標戰，包括門將嘅Carlos Miguel、維拉借將摩蘭奴(Álex Moreno)、祖達斯華(Jota Silva)、拉莫蘇沙(Ramon Sosa)同18歲德國小將Eric da Silva Moreira。另一邊嘅紐卡素4-3-3陣式，中場中位置有禁賽接近10個月嘅東拿利(Sandro Tonali)復出正選上陣。
開波20秒，紐卡素前鋒伊薩克(Alexander Isak)右路推進起腳，門將撲出不遠，由韋洛克(Joseph Willock)補射入網，為紐卡素迅速打開紀錄。早段嘅入波令兩隊形成一場攻防戰，特別係紐卡素入球後拖慢節奏，防守時呈現4-5-1陣式。相反主隊著重前場逼搶同遮線防守，得到較多射門同控球率，森林第一條防線往往形成包圍網，阻止墜後組織嘅古馬雷斯攞波，特別係以祖達施華盡量緊貼古馬雷斯，令紐卡素難以組織進攻。
雖然後備球員較為積極爭取表現，但同時佢哋較多喺禁區外或畸角位直接起腳或者傳中，加上紐卡素防守時兩線相當緊密，令到上半場開紀錄後就無再入球。
下半場積極進攻嘅森林係50分鐘透過一次界外球，手榴彈掟入禁區，混亂之中由祖達施華右腳勁ban楣底入網，成功追平一比一。
被追平嘅紐卡素終於採取主動進攻，但係球隊太遲撳掣加上狀態一般，直到70分鐘後換晒成條右邊進攻線先能夠圍攻森林，不過今日森林門將Carlos Miguel發揮神勇交出6個撲救，兩隊喺90分鐘踢成一比一，最終紐卡素喺十二碼階段四比三淘汰諾定咸森林，下一圈對手將會係英乙球隊AFC溫布頓。

紐卡素方面有東拿利復出為本場焦點，不過相隔10個月再次正選上陣表現平平，另一位中場祖連頓開季第三場狀態仍未達到上季標準，攞波俾波尺寸都未去返本來嘅水平，加上古馬雷斯被針對，相信係今場紐卡素未能攻入第二球嘅原因。至於主隊諾定咸森林球員心態積極，但正如上述大量球員上演地標戰，默契不足，最後十二碼被淘汰出局較為不幸，唯有嘅記憶點係門將表演突出，希望喺接下來嘅賽事佢有更多機會。

▼Follow 足球港場
Instagram: https://www.instagram.com/footballarena_hk/