Carbon Wallet回應本刊文章：綠色版yuu都有價值
上週本刊撰文《實測Carbon Wallet 獎勵環保行為的碳錢包？》，為大家介紹手機App Carbon Wallet （CW），及拆解環保行為換取回贈、優惠的玩法。筆者認為，CW雖然有一定環保元素，但骨子裏還是那一套「儲分回贈」的鼓勵消費方程式，就如綠色版yuu。CW火速回應，解釋質疑，並指「綠色版yuu都有價值」。
【質疑1】只有喺9間CW合作嘅素食商戶或消費，又或者幫襯指定嘅兩間植物奶合作商，用戶先可以儲CW分，係唔係等於益自己友？
回應：關於食素或植物奶賺分，我哋都意識到問題，可以賺分嘅商戶唔係好多，我哋一直都好希望可以搵到更多素食餐廳或植物奶 Cafe合作，始終初創團隊比較細，都係逐間逐間傾，有啲餐廳因為個App比較新而卻步。我哋努力中㗎喇， 歡迎大家有好嘅素食餐廳都可以介紹返俾我哋知！
【質疑2】CW淨係接受5類回收品紀錄，包括飲品膠樽、個人護理產品膠樽、鋁罐、紙包飲品盒同玻璃樽，咁點解唔接受廢紙嘅回收紀錄？
回應：我哋宜家所有回收相片記錄都係經人手批核，一方面用戶好難憑空話我哋知回收咗幾多紙（如幾多公斤或幾多張紙），另一方面我哋好難可以喺張相到，睇得出回收緊幾多張紙，我哋難以求證，等同喺屋企食素或者直情唔消費，我哋暫時受App限制都係無辦法認證到。我哋重視每個記錄嘅真確性，因為個App會計算番減碳量俾用戶知道自己幫咗個地球幾多。另外，你可能會問點解我哋要影相記錄，原意係希望降低回收賺分嘅門檻，唔使特登去綠在區區（比較遠同麻煩）都可以獎賞到市民做多啲，要喺認真做好驗證到同方便市民平衡真係唔簡單，我哋都摸索學習緊。
【質疑3】CW俾人逆向思維嘅感覺，例如搭越多地鐵，儲分越多，唔通真係搭車越多越環保？
回應：喺搭地鐵減排方面，地鐵係香港人均碳排放最低嘅交通工具，減碳嘅準則在於一個市民要由A地點去B地點，搭港鐵相比起其他交通工具或私家車， baseline 減到嘅碳比較多。你講得好啱，搭多啲車唔代表環保咗，但相對搭其他交通工具，同樣嘅距離的確係減咗碳。但我哋都明白，因為香港人搭地鐵係一件相比其他城市相對普及嘅事，所以的確有counter-intutitive嘅感覺。
【質疑4】靠環保行為儲分換優惠，係咪等同鼓勵消費？
回應：CW嘅核心的確係一個環保獎賞計劃，我哋希望做到嘅係推廣可持續消費。減少消費係絕對重要，但消費真係無可避免，而我哋覺得消費本身唔係一個錯，問題在於1) 消費係咪必要，2) 消費嘅產品係咪sustainably-made或close-looped。CW其中一個宗旨係 Green In, Green Out，環保行為儲到嘅分，換到嘅獎賞都要係支持環保，至少係同類型產品較環保嘅選擇，我哋希望獎賞係撐番香港做緊環保、喺呢個圈子努力緊嘅小店社企或大公司，俾更多市民知道係有呢啲選擇。
畢竟香港咁多人，每個人做環保嘅步伐都唔同，透過獎賞去令更多人減碳、推動建立環保習慣，香港人係真係需要。推到一個極端，智能回收機俾大家嘅現金 ，都係可以大家用嚟買嘢嘅獎賞，而買嘅嘢未必係支持環保添，所以就算係綠色版嘅Yuu都有佢嘅價值。
俾香港人知道咩牌子係支持可持續發展，就係我哋想做嘅嘢。最後買啲咩、買幾多、做啲咩都要交由消費者或大眾自己決定，我哋平台嘅角色，就係推動可持續消費，鼓勵大家日常生活中減碳 。
註：Carbon Wallet的回覆，經由本刊編輯及整理。
編輯：任盈
▼ Follow 風火山林
Website：https://hikingwindfire.com/