MC 張天賦新歌 MV〈與我無關〉被女主角獻吻嚇親，粉絲洗版揚言罷睇 MV

今年 MC 張天賦頻頻出歌，今日推出今年第五首主打〈與我無關〉延續與〈抽〉女主角詹子萱的故事。7 月底推出的〈抽〉一直成為YouTube 熱播音樂影片第一位，也是 KKBOX 三週冠軍歌及各大音樂平台新歌榜首歌曲。〈與我無關〉MV 一出立即 YouTube 登上熱門音樂影片第一位，相信成績會比〈抽〉更強勁！不少歌迷都好奇 MC 與女主角的故事走向，昨日 MC 釋出預告見到子萱衝向 MC 疑似接吻一幕，MC 再次安撫粉絲話：「放過自己，唔好炸我」，令賦二代個個大受刺激齊齊留言話要罷睇 MV 只聽歌！到最後謎底揭開原來無錫到，粉絲即刻開心哂個個都話可以放心睇 MV！

MV 首播前 MC 開 Live 同大家傾計，講起最近一次過剝咗四隻牙，痛到瞓唔到覺所以都無哂心機！而 MC 即將開始排練澳門演唱會，亦透露有機會唱新歌！另外佢尋日都啱啱睇咗上年參與拍攝嘅喜劇〈夜校〉嘅試片，佢自己都覺得好好笑，相信就快上映可以俾大家睇吓佢嘅處女作！

今次 MC 化身餐廳待應同外賣員，與女主角有更多對手戲同互動。花絮中見二人玩得好投契，齊齊釣蝦，MC 輕鬆釣到即刻炫耀一番，但見隻蝦仲生生猛猛又有啲嚇親，非常搞笑！無時停嘅 MC 被人貼咗包零食喺背脊，當佢一發現竟然係即刻諗起自己有首歌叫〈乖乖報到〉仲清唱幾句，睇嚟就算幾唔夠瞓只要有得玩 MC 都係好生猛！一向給人壞男孩形象嘅 MC 去到拍攝子萱衝向自己面前一幕的試戲，未知 MC 未準備好還是真怕羞，竟然被子萱突如其來嘅舉動嚇得怪叫出來！壞男孩形象盡毀！！MC 又使出佢嘅黑圖秘技扮醜引子萱笑，而 MC 嘅黑圖果然名不虛傳，就算醜化自己都可以氹到女仔笑！