娛圈單打︱女神原來係辣椒　星途會否係咁先

內地女星趙露思一直有「甜寵女神」稱號，皆因呢位26歲花旦擅演甜蜜愛情劇，加上樣子甜美，身形嬌小，予人嬌滴滴、受保護之感。殊不知，真實嘅甜寵女神一啲都唔甜，仲係一隻小辣椒添。日前佢向經理人公司開火，句句有骨，字字火爆，嚇窒唔少人！

事緣女神早前生病，得番半條人命咁款，仲一度連步行都成問題。事後女神透露患上「分離性障礙」，因長期受到情緒困擾，導致神經受損，就連拍攝中嘅劇集《戀人》都要中止。

正當外界以為女神逐步康復，好快可以全面復工之際，佢日前忽然喺網上跟經理人公司開火，直指公司原先答應為佢處理因病取消嘅代言工作，到頭來竟然「騙財務簽掉分帳單」被迫賠償200萬人仔，直接點名怒轟公司高層，開嗆「不幹了」。公司其後發聲明否認指控，強調一直有就露思生病一事，積極對外協調事務。

女神忽然嬲得咁緊要，大家都唔知邊個着、邊個唔着，但聽女神口脗，佢同公司起碼仲有兩年合約，家陣擺明想提前解約。之不過，單方面提前解約，可能涉及違約，女神隨時要賠錢，否則餘下時間肯定要坐冷板櫈。一下子同公司搞到咁僵，冇彎轉咁款，對星途始終有影響。

你知啦，任何行業都係識人好過識字，識做人好緊要。女神直腸直肚、有碗話碗，係就係夠晒坦蕩蕩，但若然真係同公司反面，而對方又夠晒財雄勢大嘅話，封殺你都有之。除非女神真係諗住以後唔做明星啫，否則多一句不如少一句，私下四四六六拆掂佢，總好過搞到雙方都落唔到台呀。

東網網站 : https://on.cc/東網Facebook專頁 : https://www.facebook.com/onccnews/