草蜢明年4月紅館開騷 蔡一傑狀態弗爆 揭喜歡陳慧琳原因

陳慧琳（Kelly）昨晚（27日）在紅館舉行尾場演唱會，邀草蜢擔任嘉賓。去年10月透露做了切除腦部腫瘤手術的蔡一傑，經過休養後，狀態弗爆站台，又唱又跳，草蜢與Kelly合唱《熱力節拍Wou Bom Ba》及《打開天空》，全場歡呼，之後又首度獻唱由黃偉文填詞的新歌《老的辣》。

合唱完傑仔再台上說：「喺我做完手術出嚟公布消息之後，Kelly係第一個即刻發信息畀我，佢好擔心我，佢仲同我講『哎呀，你個頭開咁大條疤，好心痛呀﹗你要快啲好番呀，加油呀﹗』佢不斷咁鼓勵我，跟住仲要讚我，我光頭時仍然咁型仔﹗」

Kelly聞言說：「真係型仔嘛，講真㗎，我唔識講大話㗎﹗恭喜你冇事。」傑仔讚Kelly在圈中人緣佳：「由佢出道開始，我哋3個都睇住佢長大，佢一路好努力做佢嘅工作，包括拍戲﹑演唱會，每一樣都做得好，佢有一樣嘢仲好，佢由以前到𠵱家都冇變過，都係咁真性情對人，同埋個人好善心，所以呢樣嘢我好鍾意Kelly原因。」Kelly笑說：「喺你口中講出嚟係真嘅﹗」

傑仔再說：「佢係好惜朋友及歌迷嘅一個Beautiful lady，所以好鍾意同佢合作。我記得我哋上一次合作，已經係10年前，喺我哋（草蜢）演唱會，今（昨）晚再一次合作，你哋開唔開心呀？今（昨）晚係last一場，有份禮物送畀你，因為幾日前我哋錄好新歌，今（昨）晚帶畀大家一齊去Party﹗」

蔡一智也預告明年4月草蜢在紅館開騷，屆時也會邀請Kelly擔任嘉賓，Kelly興奮說：「你哋鍾意我哋唱快歌定慢歌呀？」

（即時娛樂）