政Whats噏：外遊返港　黃丹晴再次確診

黃丹晴再次染疫，但完全冇病徵。

自實施0+3入境檢疫安排後，掀起港人「報復式」出門旅遊嘅現象，屯門區議會副主席黃丹晴日前亦都外遊探親，殊不知回港後再次確診。雖然要隔離7日，但閉關期間亦令佢感到外國人一旦入境香港先至中招，係非常掃興兼麻煩，認為若不撤銷無謂嘅措施，即使入境檢疫0+0同送埋機票，都唔使旨意有海外遊客嚟香港。

黃丹晴喺社交平台貼文，指自己踏上歸途做快測結果係無染疫，然而入境香港做核酸就話中招。佢話被困7日確係慘情，不過身為香港人，至少有病假拎，若果外國人咁就弊嘞，莫非7日都困喺酒店房間體驗香港美食咩？既然係咁，不如返自己國家Staycation(宅度假)好過啦，何必要畀錢嚟香港隔離呢？咁就難怪佢返抵香港，喺冷冷清清嘅機場拎寄艙行李可以咁快手啦。