冷藏薯仔可減肚腩？仲有幾款飽肚食物幫到手

踏入春天，又係時候準備個summer body迎接陽光與海灘，除了努力做運動外，緊記「you are what you eat」原則都好重要，配合適當的飲食絕對有助大家修身。覺得要轉為餐餐食菜？不用不用，其實有不少飽肚食物都係減肥好幫手，今日開始就請它們幫手踢走肚腩，同bye bye肉講bye bye喇！

冷藏薯仔

好多人見到薯仔就會敬而遠之，認為凡是澱粉質就要避。然而薯仔在眾多澱粉類食物中，熱量相對較低，比白飯、麵包還要瘦，是修身恩物。如果食用冷藏薯仔效果會更佳，因為當中的抗性澱粉（Resistant starch）會增加，較難被身體吸收，有助促進腸道蠕動及燃燒更多的脂肪。

魚

記實三文魚、吞拿魚、鯖魚同沙甸魚四款魚，因為他們蘊含豐富的omega-3不飽和脂肪酸。有不同的研究都指出，該物質可以增加負責燃燒卡路里的好脂肪，有利於修身人士。烹調的方法都好重要，最好只利用魚本身的油來煎、焗，以免攝取過量的油鹽糖。另外，即使是沙甸魚罐頭都食得，避開油浸的，選擇鹽水或茄汁浸的就可以了。

雞蛋

雖然雞蛋細細隻，但食得對亦會有瘦身功效。雞蛋黃中的卵磷脂，據指有乳化脂肪的作用，有助減少它們積聚在體內。日本近年就好流行吃兩隻蛋作早餐，因為其糖份遠比麵包少，同時又有飽肚感，讓大家有足夠能量應付早上的工作。或許部份人會擔心膽固醇的問題，其實近年已有不少研究指出，人體血液中的膽固醇含量30％來自食物，70％來自肝臟分泌，而且肝臟會按身體情況自行調整分泌量，大家不必過份擔心。

南瓜

要減肚腩除了要踢走多餘脂肪，清理宿便亦好重要，因此含有豐富纖維的南瓜就是不二之選。它亦有大量鉀，有去水腫的功效，一次過擊走埋假肥胖。不過高血糖、糖尿病的人士就要留意，如果飯同南瓜一齊食，就要減少飯量，以免過量汲取糖份。