政Whats噏：政府用英國名牌信紙　陸頌雄斥華而不實

雖則高舉「量入為出」嘅理財原則，但政府使錢向來都好疏爽。立法會今日(20日)進行《2020施政報告》致謝議案辯論，議員陸頌雄發言時就指政府畀議員嘅信件，所用嘅紙係張來自英國名牌，貴過普通白紙成10倍！

陸頌雄發現喺政府畀佢嘅信紙上有暗花，非常精緻，查看之下先至發現信紙係來自英國高級商用紙張，50張紙要40港元，差唔多1蚊1張紙，普通嘅白紙都唔使1毫子1張啦！陸話明白政府可能想用靚啲嘅紙以示誠意，但其實應該慳得就慳囉！

所謂見微之著，陸認為引伸至好多公共開支上，都希望政府可以盡量簡約，例如興建公共設施時，市民要嘅係講求實用同埋可以盡快提供服務，而唔係一棟外表華麗嘅建築物。

陸認為政府嘅工作速度要跟得上世界千變萬化嘅節奏，而唔係因遁守舊。政府選用英國名牌靚信紙，莫非仍然眷戀英殖時代？

東網網站 : https://on.cc/

東網Facebook專頁 : https://www.facebook.com/onccnews/