佘詩曼做最強契媽　攬完鍾志光姪孫再攬5位契女

「四屆視后」佘詩曼向來愛小朋友，早前就已經與好友小朋友上契，成為唔少人嘅契媽，估唔到佢真係去到邊都吸引到兒童，日前佘詩曼出席活動時，就遇到一位男孩雙手熊抱佢，佘詩曼由驚訝變冧樣得，非常甜蜜，畫面有愛。原來呢個小朋友唔亂攬視后，佢係藝人鍾志光姪孫，鍾志光對佢非常愛錫，早前為幫姪孫刷流量，鍾志光開設社交網引流，爺孫拍住上拍旅遊片狂吸流量，又周圍帶佢去見一眾圈中好友，星光熠熠晒人脈。

佘詩曼攬完鍾志光姪孫，佢亦都攬攬自己多位契女，前日（11日）就晒出大批合照，話自己突然間好掛住5位契女，即興約食壽司，仲大爆佢哋年齡由10至到18歲，個個都可愛又真誠。一行6人食完飯就去買嘢飲、糖水，再喺屋企玩遊戲同唱K，合照時又大做鬼臉，5個鐘都過得好快樂，佘詩曼愛心爆棚，對住小朋友真係咩都Say yes，絕對係最強契媽！

東網網站 : https://on.cc/東網Facebook專頁 : https://www.facebook.com/onccnews/