楊洛婷倒奶慶生　結婚10年建立美滿家庭夢想成真

前港姐楊洛婷（Rabeea）同老公樂隊Dear Jane主音Tim（黃天翱）向來恩愛，婚後育有一對仔女，一家四口幸福美滿。昨日（16日）係楊洛婷43歲生日，佢喺社交網大晒一系列老公以及一對仔女同慶生嘅相同片。而最大亮點就係以低胸裝上陣嘅佢，烏低身許願嗰陣倒出3吋事業線，搶盡「峰」頭，果然係有料之人，而吹完蠟燭之後，佢獲老公同仔女獻吻，溫馨滿瀉！

今年係佢哋兩公婆結婚10周年，Rabeea表示能夠與Tim組織到一家四口嘅小家庭係夢想成真：「33歲嘅時候，我同佢結婚，當時我最希望同佢建立一個美滿嘅家庭，我就成為佢嘅黃師奶。今日43歲，夢想成真。我對依家擁有嘅一切十分之感恩。我覺得冇一份禮物比我哋一齊建立嘅家庭更好更重要，佢哋係我嘅一切。祝我自己生日快樂，我哋嘅結婚十周年快樂！」

東網網站 : https://on.cc/東網Facebook專頁 : https://www.facebook.com/onccnews/