汪小菲內蒙古親子遊驚見「大S」　小S飛澳洲散心

台灣已故女星徐熙媛（大S）一對子女如今由前夫汪小菲照顧，與其現任太太馬筱梅（Mandy）經常一家四口出遊，趁依家暑假，四人就飛咗去內蒙古玩，當中眾人均換上蒙古服參加開幕典禮，大批佢哋去玩嘅片段於網上瘋傳。

眾人第一站去到呼和浩特，一家四口去大草原牧場體驗擠牛奶、抱小羊，囡囡玥兒同仔仔霖霖一聽到導遊話可以抱小羊時，玥兒即驚訝地嗌：「抱小羊呀！」開心接觸大自然，轉頭佢又去策騎，玩得非常開心。不過網友更關注11歲小玥兒身高已衝破1米6，側顏同背影更係完全復刻大S，而小玥兒亦頻頻同爸爸汪小菲有愛互動，好似玥兒為汪小菲整理衣服、落雨時汪小菲為小玥兒擔遮及搭膊頭等，相反太太Mandy只能跟喺眾人身後。

當汪小菲同大S仔女玩得盡興時，大S妹妹小S（徐熙娣）依家已正式走出家姐陰霾，繼早前為二女Lily宣傳畫展後，今次就被發現舉家現身澳洲雪梨玩。有網友喺酒店大堂偶遇小S一家，小S老公帶墨鏡現身，兩個囡囡氣質超好又瘦，獲大讚頭髮順滑亮澤，眾人企埋一齊即吸引路人目光，直指被Lily背影吸引。大女Elly則於社交網晒出金髮海灘照，令網友驚嘆小S嘅千金都係大美人。

但S媽尋日（14日）深夜再度發思念文，仍未能放下大S離世之哀，短短寫下9字：「想我的寶貝女兒，珊珊（大S乳名）」傾吐對愛女嘅無盡思念。網友們急忙關切留言：「徐媽保重身體，我們大家都想她」、「大家都想念大S，陪您一起度過難關」、「就靜靜的想念女兒吧」。有網友用電影《玩轉極樂園》經典名言開導：「世界上有人還記得你，就不是真正的死亡」、「死亡只是肉體的消逝，換作另一種形式的陪伴」令S媽稍微釋懷，回覆該名網友：「感謝我們的影劇圈，我替女兒謝謝大家。」

東網網站 : https://on.cc/東網Facebook專頁 : https://www.facebook.com/onccnews/