何雁詩照顧罕病兒冇時間唔開心　懶理網民負評：唔想呢啲嘢影響我

何雁詩（Stephanie）與鄭俊弘（Fred）走過第三者風波，於2020年結婚，三年前誕下兒子鄭讚廷（Asher）組成三口之家，儘管兒子患上罕見基因突變病天使綜合症，為她帶來了沉重打擊，亦無阻Stephanie繼續追尋其唱歌夢。何雁詩近日推出由周國賢包辦曲詞創作的新歌《欲哭無淚》，電台訪問今日（19日）出街，她受訪表示雖然目前「阿囝行先」，仍堅持唱歌，因有自我價值肯定才能維繫家庭，她更透露兒子歲半證實患病時，曾讓老公鄭俊弘及何家上下陷入「欲哭無淚」的崩潰狀態一段日子，後來是何雁詩為母則強、堅強地調整心態，令全家人為愛兒重新振作。

何雁詩與鄭俊弘披露兒子病況後，雖然經常以正能量形象示人，鄭俊弘過去亦曾透露兒子證實患病後，曾長時間攬住阿囝日日喊，Stephanie直認不諱：「係！頭嗰三個月，唔止Fred，全屋企氣氛都好沮喪，無論我哋，定係（傭人）姐姐，又或者我父母都係。譬如本來見到媽咪同阿囝玩得好開心，但轉頭佢行去廚房就喊，全家人都係咁。見到咁嘅狀況，我就明白要be 強！be strong！」Stephanie指鼓勵老公振作的方法就是一起為孩子計劃未來：「計劃唔到四、五十年後嘅事，呢啲無得plan，係安排阿囝點接受治療，或者我哋學習點照顧阿囝。當我迫住自己搵資料嘅時候，就無時間唔開心。另外，無幾耐舊年4月中，又開始策劃天使綜合症慈善音樂會，有忙嘅目標，就令我哋快啲 get over（唔開心嘅）情緒。」

談及鄭俊弘婚前婚後的改變，Stephanie說：「結婚前佢man啲，婚後就變咗我man。到阿囝有事，就大家一齊be a man，一齊做好照顧阿囝嘅崗位。」雖然兒子患病曾令全家人沮喪，但Stephanie指阿囝的病反而令全家族的感情變得緊密了：「學到最大支持嚟自全屋企人，全家人變咗一隊守護team，有由細湊大我嘅姐姐、我媽咪、再加我哋兩夫妻共四個人，我哋互相遷就時間睇住阿囝。而家除咗同爸爸媽媽，亦同 Fred家姐同媽咪都係因為阿囝嘅問題close咗好多，亦好感激Asher將我哋拉近晒，以前我每個星期都唔會同父母食超過兩次飯，而家我一有時就返屋企一齊食。」

相對鄭俊弘，何雁詩於人前絕少展露軟弱一面，Stephanie坦言：「因為唔需要！展露脆弱又點？我又唔係等人拯救，我唔開心會放響音樂作品上，出嚟做訪問或見人，點解要畀人見到唔開心？」至於經歷入行十六年，今天的何雁詩對於網上有關對其兒子落井下石的留言已沒再動氣：「好多嘢都唔會嬲，都慣咗。我唔了解佢哋嘅出發點，只能接受大家睇嘅嘢唔同。譬如有個留言好有趣，話：『你個囝都唐唐哋，都幾大鑊！』我本來想覆佢我個囝唔係唐氏綜合症，係天使綜合症，希望let him know純粹分清楚，最後都係覺得唔理得咁多，唔想呢啲嘢影響我開心唔開心，我已經好多嘢要處理，我係無時間。」

出道至今，何雁詩被指家境好、贏在起跑線，她說：「每個人都有好嘅嘢同唔好嘅嘢發生，無得比較，我只可以講我人生好豐富，但無乜安寧過。」她坦言父母的價值觀最影響她，令她成熟處理今天面對的任何問題：「父母價值觀好好，佢哋係好giving、好有愛、好有義氣嘅人，教得我好好，好值得我學習。」最後，何雁詩亦坦言再生第二胎沒有陰影，她說：「I’m not afraid！我一直認為我人生唔止有一個小朋友，我想生多幾個添。」