余文樂帶囝囝踩電動單車　網友鬧冇做安全措施

余文樂晒價值$35,000電動單車。

藝人余文樂早前因到內地拍戲，故近日返回台灣要進行隔離，連帶自己生日都要隔住塊玻璃同老婆慶祝，時間過得特別快，呢日余文樂喺社交網透露終於出關。

一出關，余文樂即揸住架價值3萬5千港元嘅電動單車夜遊，去到今朝即做番個慈父，同囝囝余初見齊齊踩單車，原來余文樂話之前曾經承諾過會帶囝囝踩單車，要講得出做得到，唔可以呃小朋友，佢留言：「我答應了他回來的話，要跟他騎車去公園玩～所以今天早上我們就出發了*說到做到，不能騙小孩，他們會記得的。」不過唔少網友指佢冇為小朋友做好安全措施，冇戴頭盔同護膝，但亦有網友指余文樂陪伴在側，相信佢有好好睇實自己個仔。