《觸電》題材新穎　驚喜又精彩嘅電影

《觸電》上星期正式上映，題材新穎，係驚喜又精彩嘅電影。只係60蚊就可以入場欣賞，抵到爛！
（以下有劇透）

「逆境令我拋低所有框架機率只係數字睇你博唔博一鋪」

故事有創意，用咗電競同遊戲動作片兩個喺港產片非常少見嘅概念，估唔到兩者融合會咁有趣。電影執行上亦相當出色，節奏快無拖戲。細節位好似選手設備、比賽術語，甚至旁述都做到同真正電競比賽無異。

「帶齊裝備推進 it’s going down 對準後腦 one shot 擊倒你」

而遊戲設定簡單，無喺玩法同角色上做太多花巧野。遊戲內外角色喺語氣、性格上亦演得相似，觀眾好容易就分辨到。每場game都非常緊湊，動作場面特別，拳拳到肉中又帶點打機嘅科幻感。

結局雖然輸咗比賽，但贏得大家嘅尊重，為電影畫上合適又有意思嘅句號。

「扣下板機我哋 lit 到好似過年拎走賞金 next game 絕對冇話拖延」

演員組合有新鮮感，成員間跨世代嘅友誼令人會心微笑，仲帶出到為目標奮鬥，個種熱血團結嘅精神。阿Will擔正完全無問題，將角色成長演得細緻動人；Chloe唔駛講，一出嚟已經擔曬鏡；同埋林敏驄真係夠曬鬼馬搞笑，每場戲都總可以搵到發揮空間。

「有危先有機風險多多贏得到我哋只係錯覺」

無可否認，《觸電》劇本上係有啲小瑕疵，但絕對稱得上係一部佳作，我非常喜歡，亦為近期相對沉寂嘅港產片市場帶嚟一點衝擊。

最近話港產片題材沉重，只識探討社會議題嘅聲音再次湧現，《觸電》正正證明就算係小品，依然能拍出輕鬆又富創意嘅香港電影。

「Every round we hit the spot 下下爆頭下下 headshot」

咁多位，Good Game🤙

娛樂