陳山聰新片口碑票房雙贏　梁烈唯身兼編劇翻睇都喊

由藝人陳山聰、梁烈唯及林盛斌（阿Bob）投資、製作及主演的馬來西亞賀歲電影《媽媽又要嫁》，踏入馬年即傳來好消息，自大年初一上映以來口碑票房雙雙報捷，票房衝破200萬令吉（約400萬港幣）大關，令「三兄弟」振奮不已。

近日「三兄弟」再到當地進行第二輪宣傳攻勢，不停到不同戲院謝票，親自答謝入場觀眾支持。作為一套「笑中有淚、溫馨動人」的合家歡電影，《媽媽又要嫁》成功吸引大量家庭觀眾入場支持，不少觀眾大讚：「真係由頭笑到尾，喊完又笑，笑完又喊！」幾位主角的搞笑演出更令觀眾讚口不絕，尤其是唯唯的演繹、Bob的爆笑對白，再加山聰的反差萌，令觀眾過一個開心又窩心的農曆新年。

唯唯這次更身兼編劇，對於得到大家的喜愛，而且好多留言也指有笑有淚，同埋那種真情，唯唯表示：「就係我寫呢個故事想要做到嘅嘢，其實我好幾次謝票，我喺旁邊再睇，也會忍唔住喊！有咁樣嘅票房，真係好感謝入場睇啲觀眾。」山聰此行帶同太太、兒子Jaco及工人姐姐一同到當地，第一時間讓他們入場捧自己場，太太跟Jaco都大讚套戲好睇，山聰問Jaco好唔好笑，Jaco答：「有好笑啦！」十分搞笑，山聰踢爆阿仔因為睇戲有爆谷食，所以睇得好開心，而工人姐姐都覺得套戲好好笑，所以山聰相信電影質素確不錯。

提到新戲票房口碑雙報捷，山聰坦言真的好開心，但他們「三兄弟」未敢鬆懈，希望盡力跑宣傳謝票谷票房，山聰說：「要繼續衝衝衝，希望票房可以再升，其實有咁嘅成績同口碑已經好好，因為每次聽到觀眾讚套戲好好睇，已經係我哋今次拍呢套戲最大嘅回報！」

東網網站 : https://on.cc/東網Facebook專頁 : https://www.facebook.com/onccnews/