Lokman捲海報風波親認疏忽　勾起大眾陰影：下次做好啲！

男團MIRROR隊長楊樂文（Lokman）日前推出第二支個人單曲《FLY》，他表示覺得以往唱過的作品感覺較「重」，因此新歌希望帶出一種「輕」的感覺，就連唱腔也「唱輕啲」，他説：「唱都有段故，當初收到Demo嗰陣發現死火喇，因為唱Demo嗰位唱開R&B，嗰種節奏係我最唔叻嗰種。」他坦言因不是自己擅長故擔心起來：「開始練，愈練愈開始氣餒，問經理人點算、監製點算，佢哋話個Artist本身唱開呢個曲風，叫我可以用番自己唱法錄一次，跟番自己感覺，結果錄完大家都覺得Ok。」

提到新歌帶出輕的感覺，但宣傳海報卻勾起3年前的紅館意外，結果引發軒然大波，問事前問他有否看過該問題海報？他坦言不論歌曲、海報及MV也是配合《FLY》主題，因此整個團隊也將注意力放於此：「我哋只係想呈現一個舞台，大家31號睇到個MV就會了解個主題。（沉迷喺主題忽略咗引起問題？）就住今次事情大家之後都會提高敏感度，睇吓有乜嘢可以再做好啲，唔好令大家唔舒服。」談到紅館意外距今已3年，但卻因今次事件重新勾起大眾回憶，問可有對MIRROR有影響？他說：「其實大家對件事一直都Keep住有感覺，我覺得好似人生咁，所有嘢都有起起落落、濃濃淡淡，要睇吓自己點面對。（今次事件有冇影響MIRROR？）影響唔係淨係影響我哋，同樣影響好多人，所以要提高敏感度，繼續做好啲，從中學習令下次更進步。」

談到今次風波同樣影響到阿Mo，他表示一直有留意有關對方的所有報道，不過認為應給予對方空間：「佢依家喺外地專心康復，希望佢慢慢愈嚟愈好。（有聯絡？）有留意佢新聞，但會少啲接觸，畀啲空間佢，佢有佢嘅方向。（知佢去外國醫？）都係同大家一樣差唔多時間知，一路都希望佢快啲康復，按住佢心目中嘅理想程度邁向嗰個方向。」他坦言今次風波多少有影自己心情，自己會「睇闊啲」，覺得所有事情、事物都有其緣分，若自己執意選擇被影響，未必是好事，覺得不如去擁抱它再從中感受：「人係可以不斷進步、成長，只要你唔停低，只要你有思考、諗法，咁就可以繼續向前行。」

Lokman表示今次風波未有打擊自己，反而令他認清可以將事情再做得更好，敏感度再提升：「盡量減少令大家產生聯想，唔會令大家有不安感覺。」問到事發後MIRROR兄弟有否安慰他？他表示大家經歷過不少事情，已學懂給予空間讓對方去消化：「真係第一個搵我嘅係ERROR嘅何啟華，佢Message問我有冇事，我話冇乜嘢，OK、Thank you ！（當時拍緊團綜，隊友反而冇出聲？）我哋男人的浪漫，行過嚟拍一拍我，跟住就化妝整頭，大家識咗咁多年，大家都知對方性格，講太多未必幫到件事，喺身邊就係支持。」另談到經理人花姐早前的「我最喜愛」言論引發風波，他他笑言不敢評論，覺得只就住一句話去評論所有是不公平。

Makeup：Giann Cheung @Annie G. Chan Makeup Centre

Hair Stylist：Seiko Sin@ HairCulture

東網網站 : https://on.cc/東網Facebook專頁 : https://www.facebook.com/onccnews/