郭柏妍為角色剪走20年長髮　日日苦練大提琴

無綫新劇《麻雀樂團》是一套圍繞親情為主題的輕鬆溫情小品，將於28日播出，主演的郭柏妍（Rosita），一改長髮女神形象，刻意剪短髮以演繹熱愛大提琴的純真少女，望落較真實年齡27歲還要青春，十足大學生！

郭柏妍透露超過20年沒有剪短髮，所以確實有些不捨：「我由細到大都好少剪短頭髮，唯一一次係我婆婆叫我剪，剪完之後發現其實唔係好啱自己，之後嗰20年都冇試過短頭髮，所以呢次對於我嚟講係一個幾大膽嘅嘗試同挑戰。其實我都好唔捨得，監製叫我剪時我都覺得：『真係剪㗎？』但後來我覺得作為演員，呢個都係幾大嘅突破，同埋頭髮剪短咗可以留長番㗎嘛。」她又感激監製及梳化工作人員，為顧及其感受，用了很多時間為其設計適合的靚靚短髮Look，希望觀眾會喜歡她的新形象。

為了紀念剪短髮，Rosita將重要的剪髮Moment拍片放上網，片段中Rosita剪髮期間表現緊張，嘟嘴兼流露不捨眼神，一度激動至眼泛淚光。但她對髮型師指令亦言聽計從，相當乖巧。除了變髮，Rosita還為角色學拉大提琴，於開劇前數個月已秘密練兵，她還會將居家拍攝的練習片段傳送給劇組過目，希望做到盡善盡美。最搞笑是，她發給劇組的練習照，都加上「特別的馬賽克」，保持私隱。

Rosita表示本身學過單簧管，但對大提琴是由零開始，所以不敢偷懶，不停練習，她説：「好多謝監製畀咗個好好嘅機會我學大提琴，但嗰時因為好不幸喺台灣踩滑板時整親手，一路都唔係幾好得番，有段時間真係拉唔到。不過一好番我就即刻上番堂，好多謝公司安排咗大提琴老師教我，另外我都有日日返屋企練，因為大提琴係需要持之以恒練習。雖然我同專業仲爭好遠好遠，但我希望盡最大能力，等觀眾喺劇集上見到我時，會有少少覺得呢個女仔都真係似拉緊大提琴，希望大家見到我少少嘅努力。」問到大提琴如此龐大，出入時有否造成不便時，Rosita坦言乘搭交通工具時確實很易撞到人或是被人撞到，並因而對學習大件樂器的音樂愛好者更為尊敬。

東網網站 : https://on.cc/東網Facebook專頁 : https://www.facebook.com/onccnews/