卡塔爾特集｜瓦其夫市場｜餐廳唔識做生意｜玩嘢雪糕檔搶fo｜

卡塔爾世界盃日記 Day3

沙特半個主場嚇你一驚

一日四場波，想睇晒又想出去行下，時間真係要安排得好好。頭場阿根廷出場，當然唔可以錯過，我哋搭Metro去瓦其夫市場（Souq Waqif），準備搵一間有直播嘅餐廳食晏，喺Metro站內遇到正前往球場嘅突尼西亞球迷（突尼西亞打第二場），佢哋又打鼓又跳舞，連BB仔都舉起埋，確係忘我境界。

抵達瓦其夫市場，原來有直播嘅餐廳選擇唔多。搵到一間，電視唔算大，一千零一部，只能夠畀前面三枱客人觀看，事實上大部份客人亦唔係嚟睇波嘅，都係坐喺露天位吹水。當時睇到波嘅三枱都坐咗人，但比較側嘅一枱仲有兩個位，我哋嘭嘭聲揳埋去，跟手問侍應攞餐牌，諗住叫定餐等睇波。

呢個時候，卡塔爾令人摸不著頭腦嘅事情又發生。正值一點鐘午餐時間，我哋想點嘅菜全部冇得供應，成個餐牌入面得三款菜式可以叫，我哋覺得唔啱胃口，最後只係叫咗兩杯咖啡。更離奇嘅係，呢度嘅餐館通常都有樽裝水賣，大約4蚊卡塔爾幣（8港元），原來呢三枱客全部冇叫食物，有幾個連咖啡茶都冇叫，就只係叫咗一支水！我心諗：想花錢點餐嘅客人就乜都冇得點，幾蚊叫支水嘅人就可以霸住個位睇足全場波，生意咁做都唔蝕本係一個謎。

呢幾枱中東客當然係撐沙特啦，當中有幾個中東女士，都挽著名牌手袋。我哋抱住鋤強扶弱心態，同佢哋共同陣線。上半場阿根廷先開紀錄，看似正路，但下半場認真精彩，不消8分鐘沙特連入兩球反吸，當地人都極度亢奮，我哋同佢哋一齊歡呼。

沙特維持優勢到完場，爆出咗今屆第一場大冷門，更令阿根廷36場不敗斷纜。完場後沙特球迷喺市場勝利巡遊，大衛揮低哥利亞，抵招積嘅！

間場時間喺市場閒逛一下，比較特別嘅係有幾檔「玩嘢雪糕檔」。雪糕小販起初一本正經幫小朋友𢳂雪糕，但佢可以用支棍黐住杯雪糕，將杯雪糕遞過來，正當小朋友想接住之際，佢會用盡方法唔畀你攞到，更加可以將杯雪糕吊住周圍揈，甚至用支棍敲鐘，而黏貼力特強嘅雪糕可以成桶份量吊起來，玩嘢至極。小朋友俾佢玩到陀陀擰，但又好開心。

下一站去到一間酒店嘅酒吧睇丹麥，只有呢類場所有得啤啤佢。場內坐滿墨西哥人，應該係呢間酒店嘅住客。佢哋關心嘅唔係呢場波，因為墨西哥稍後緊接出場，佢哋先壯聲威，仲請全場人飲Tequila，中場時就齊齊出發去球場。

悶戰一場後，街頭上演煙花同無人機表演，無人機除砌出「Welcome to Qatar」字句，更立體呈現大力神盃。晚飯時間墨西哥對波蘭，利雲度夫斯基冇理由唔睇（港婦猛話：場場都要睇，一日四場頂唔順⋯⋯），一於邊開餐邊睇波。點知又係0:0，港婦發晒吽哣。

尾場法國，都係嗰句，大熱門冇理由唔睇。去番同一間酒店（Horizon Manor），今次上咗3樓嘅Baila酒吧，嚟過一次發覺氣氛一流，直播電視多，人氣旺，有live band，開到2am，想搵番喺香港睇波嘅感覺，呢度不作他想。周圍坐滿沙特人（據報道，世界盃期間每日有過百班機由沙特飛來，唔講得笑），佢哋當然仍然沉醉喺勝利當中，法國嗰邊廂大炒澳洲，佢哋呢邊廂狂歡豪飲。

是日賽果：

阿根廷 1:2 沙特阿拉伯

丹麥 0:0 突尼西亞

墨西哥 0:0 波蘭

法國 4:1 澳洲

By港佬

港婦漂流：

https://www.facebook.com/profile.php?id=100086404281791&mibextid=LQQJ4d

https://www.youtube.com/@kennis.chiangmai

Ig: @kennis.chiangmai