電玩吹兩嘴：任記Labo出Drive Kit 追唔追好？

大家仲記唔記得任天堂為Switch推出過紙板玩意Labo嗎？當中起始套件Variety Kit以及化身機械人的Robot Kit曾經在港掀起一陣話題，可惜熱潮後勁不繼。之前電‧競女提過官方將加碼推出第3彈Drive Kit，而行貨將於下周五到埗，日前任天堂更釋出最新宣傳片來介紹玩法。到底Drive Kit會否再現炒風？大家又入唔入得過呢？今集同大家關注一下！

定價和起始套件Variety Kit一樣，今次任記Labo紙皮玩具Toy-Con第3彈Drive Kit一改較靜態的玩法，直接推出海陸空3種駕駛套件，大家只係用幾百元就可於有趣大陸以越野車、潛水艇和飛機闖蕩冒險。而從新釋出的介紹片段可知，玩家的Switch本體將充當體感腳踏、Joy-Con則變成3種載具的「車匙」，當插上不同駕駛套件時，畫面就會變化出相應載具。如當駕駛越野車時，拉動右側繩圈可令車身蓄能跳躍，而軚盤上方的推桿，既可以當成水潑，又可以喚出電鋸切割。而潛水艇形態，操縱兩側的旋鈕用來控制推進移動方向，按中央按鈕更可吸住金屬從而拉扯。至於飛機比較簡單，玩法跟一般Joy-Stick差不多。電‧競女玩過上2個套件，認為今次Drive Kit組裝無咁多零碎組件，收納會比較簡單，加上一隻Game玩晒海陸空3種體驗，對於唔想用腦輕鬆打機嘅朋友，入手呢款Toy-Con比較吸引呢！

電‧競女向來比較少介紹N3DS遊戲，只係最近心血來潮晌櫃桶拎番部5年無開過嘅日版主機，竟然仲有電可以玩得到，真係襟玩到難以置信，所以忍唔住睇下仲有咩遊戲推出囉！講番呢款11月29日上架的RPG作品《女神異聞錄Q2新電影迷宮》，就集結了P3至P5共28位主要角色，盜賊團一行人誤進了奇妙的電影異空間，玩家需要組隊冒險逃出生天。而自動生成迷宮玩法就跟同廠的《世界樹迷宮》系列差不多，就連畫風模組都大同小異，有玩開嘅朋友應該駕輕就熟啦。

又一套《少年JUMP》連載作品動畫化啦，今次係川田筆下，以日本國技相撲做主題的超熱血運動漫畫《火之丸相撲》。作品將於10月登上電視銀幕，最近官方就推出宣傳片段畀粉絲「熱身」。故事中主角「潮火之丸」曾經是小學相撲雙冠王，但升上中學後卻因故銷聲匿跡，然而進入太刀高中的他決定重新出發，在弱小到不行的相撲社復興活動，更矢志打入全國大賽，以橫綱為目標打下重要一步！