楊鎧凝準備升中一　流利日文大談少女心事

「美心妹妹」楊鎧凝（Celine）3歲靠一副精靈萌樣殺入娛圈，當年拍住黃翠如拍攝無綫劇《愛我請留言》飾演「悠悠豬」一角備受歡迎，眨吓眼Celine今年已經12歲，小學畢業準備升中一，雖然疫情下同學仔要留在家中上堂，但喺開學前Celine捉緊暑假嘅尾巴，亮相藝人方紹聰（奶仔）及盧峻峯嘅網上節目《約女Yama嗲》擔任嘉賓行飛鵝山。

片中見佢個子長高咗好多，雖然身形同面都係圓碌碌，但行為舉止就明顯成熟咗，略帶點少女味。講得一口流利日文嘅佢，興起一邊清唱日文歌一邊跳舞，仲教奶仔佢哋講日文。過程中Celine玩快問快答，佢透露鍾意張繼聰多過周柏豪，又大談少女心事，自爆小學三年級收過男同學情信：「入面寫話『我鍾意你』，我當時仲問係咪即係鍾意同我玩，點知旁邊個朋友話我蠢，叫我聰明啲。」佢又大方透露一年級有心儀對象，真係人細鬼大！唔少網友大讚Celine真性情，又指佢愈大愈似媽咪，十足餅印。

東網網站 : https://on.cc/

東網Facebook專頁 : https://www.facebook.com/onccnews/