卡塔爾特集｜球迷保安凌晨鬥腳法

今日嗱嗱臨去多哈會展（Doha Exhibition and Convention Center）搞番掂啲e-ticket，跟住去附近嘅City Center Mall買過部電話兼出番張SIM卡，不過最麻煩係冇咗張香港卡，收唔到驗證碼，好多嘢都登入唔到，馬會App都俾人鎖死咗，冇得落注。

因為遺失電話後要重新開通Hayya App，今日嚟到多哈「中環」West Bay。

City Center Mall呢個大商場位處多哈市中心最繁華之地，裡面應有盡有，世界盃期間中庭更搖身變成超大嘅充氣兒童樂園。唔止咁，商場入面本身亦有間好大嘅遊戲中心，大人shopping，細路playing，啱晒！

買完電話即刻醫肚先，鋸住扒睇頭場。嚟到卡塔爾咁多日，主要都係食中東菜，一唔係就Pizza漢堡包，開始有啲頂唔順。呢個大商場有好多唔同餐廳，可以轉下口味。

Set好個新電話，仲要出過張當地電話卡，搞完一堆麻煩嘢，搵咗間有球賽直播嘅cafe睇下波鬆一鬆，南韓隊喺3分鐘之內連追兩球，熱血爆燈，點知冇耐又一盆冷水照頭淋，孫興民難掩失望之情。

入夜後，City Center Mall外面遊人絡繹不絕。

對面商廈外牆正好有個巨型孫興民，可惜南韓今日功虧一簣。

間場時間喺街外行一圈，West Bay商廈林立，夜景璀璨。

邊個先係終極王者？

City Center Mall嘅食肆果然應有盡有，竟然有罕見嘅中餐打邊爐，叫「上海花園」，放題嚟嘅，質素就一般啦。

睇埋葡萄牙對烏拉圭先至返球迷村，返到去凌晨一點，居然仲有球迷圍圈踢波自得其樂，連保安都玩埋一份！

是日賽果：

喀麥隆 3:3 塞爾維亞

南韓 2:3 加納

巴西 1:0 瑞士

葡萄牙 2:0 烏拉圭

By港佬

港婦漂流：

Ig: @kennis.chiangmai

旅遊