「籃球女神」方泳琳誕女　怕血老公勇闖產房剪臍帶

「籃球女神」方泳琳（Jessie）與前甲一籃球員陳張敏（Ryan）於前年結婚，今年4月宣布造人成功，喜懷女B，昨（1日）囡囡順利出世，方泳琳於社交平台分享相片，將產前到產後的心路歷程來一次全紀錄！

她分享了多張孕照，兩夫妻赤腳跳舞，一起迎接人生新一章。方泳琳表示：「聽日就見到你喇，超期待！勁興奮！See you soooooooon」，之後於限時動態指自己已經入院，早上入產房時又再次打卡，全程老公陪伴在側。

直至昨日，方泳琳宣布囡囡出世，英文已改叫Railey，並寫道：「1.8.25 Welcome to the world, My baby Railey」。之後續寫：「第一下聽到你嘅喊聲，媽咪Daddy都好感動，原來一個新生命誕生嘅喜悅，係好難用筆墨去形容！Railey以後請你多多指教，歡迎加入我哋嘅大家庭，同一班哥哥姐姐好好相處，我哋一定會好好學習做你父母。」

榮升老竇的陳張敏，全程笑不攏嘴，方泳琳更指：「另外要讚一讚怕血嘅Daddy好勇敢入嚟陪產，同埋剪臍帶手勢都唔錯，不過唔好睇佢笑到四萬咁口，其實佢係緊張到出晒手汗。」對於方泳琳做媽咪，圈中人廖子妤、李綺雯以及陳葦璇等都有送上祝福。

東網網站 : https://on.cc/東網Facebook專頁 : https://www.facebook.com/onccnews/