跑步與人：Mandy 文荻

1.跑步年資？為什麼開始跑步？

我大概斷斷續續跑了7年左右，最近呢三年先開始keep住跑步。

一開始跑步原意係因為疫情個陣每日都食宵夜，唔講唔覺，一照鏡真係見到自己又腫又肥，所以之後單純為咗減肥先去跑，當keep住去跑之後，開始上癮，幾乎每日都會諗住快啲做完嘢就返屋企換衫去跑，發覺跑步真係好爽。我特別鍾意跑戶外，一來我好鍾意睇天空，我可以睇天空睇半個鐘一個鐘，所以戶外跑步嘅時候一邊跑一邊沿途睇到好多唔同嘅景色，再加上我住新界，會遇到好多鍾意跑步、踩單車嘅人，佢地真係會同你打氣，嗰種感覺真係好激勵！

2.有沒有跟跑會或教練跑？選擇原因？

我無跟跑會或者教練跑呀，其實我本身係一個比較外向嘅人，平時好少Me Time俾自己，所以跑步係我唯一可以自己同自己相處嘅moment。所以我比較喜歡一個人跑步。

3.最喜歡的跑步用品品牌？最喜歡一對跑鞋？

我自己跑步的話就鍾意HOKA同埋asics 。自己著緊就係HOKA嘅跑鞋，因為鍾意佢獨特厚底設計同埋佢嘅設計係緩震性能，就好啱長距離跑步同埋夠舒適性。

4.喜歡什麼時段跑步（早跑/晚跑）？為什麼？

無特別分早跑/夜跑，都係睇自己時間安排。

5.可以推薦一條跑步路線比大家？

如果住新界嘅朋友可以試下跑南生圍，全長約5.5公里 沿路都可以睇到唔同自然風光。 或者屯門海濱公園：全長約8.6公里。

6.作為女跑者，可以建議一些防曬或運動化妝秘訣給其他女跑者參考？

跑步最好最好最好真係唔好化妝，因為當你化妝嘅時候會堵塞毛孔，跑步會冒汗，會令面部毛孔張開，如果化妝品一直喺表面，就好容易生暗瘡，如果日頭跑步嘅朋友其實可以選擇噴霧式嘅防曬，因為份子比較少，不過最好選擇高度數嘅防曬噴霧；如果夜跑嘅，我建議可以唔使塗任何產品都可以。

7.除了跑步，有沒有做交叉訓練？（例如舉重/游泳/瑜伽）對跑步有沒有幫助？

除咗跑步我都勁鍾意游泳，都係有氧運動，加上游泳係全身性運動，同埋可以提高心肺功能之餘，仲可以鍛鍊到全身運動，我自己覺得跑步同游水都可以好快速減肥嘅運動。

8.現在或過往有沒有跑步傷患？如何處理？

近半年都發現每次跑步膝蓋疼痛，試過左腳跑跑下好似架車「無油」咁，一啲知覺都無，個菠蘿蓋腫到好似個水球咁，真係忍唔住去咗睇中醫 ，先知道原來膝蓋外翻同埋骨與骨之間有水腫問題，試過針艾灸、電灸，之後再有睇物理治療，治療師都幫我檢測 、治療，再教我用繃帶固定，又教我點行路跑步，我先發現原來我自己連行路都唔識，先搞到膝蓋內損哈哈哈！！

9.現時跑步目標是什麼？

一開始我係由2K跟住4K到5K，慢慢適應再加跑步長度，而家習慣咗跑步之後就開始6K起跳，我目標希望可以keep到每次跑10K，然後再訓練睇下可唔可以跑到半馬 ，因為我都想參加下年馬拉松，呢個係我嚟緊想挑戰嘅目標。

10.跑步跟工作有沒有關係？

我工作其實同跑步無太大關係，但係絕對係我工作之後釋放壓力嘅好重要環節，因為我工作係關於廣告Marketing，有時候面對好多客戶同工作，精神好繃緊，再加上會有唔同嘅壓力，有啲人可能會平時飲下酒紓壓下，但係我自己就唔係太鍾意飲酒，又唔會去瘋狂購物減壓，哈哈哈，所以跑步應該算係我唯一可以令自己冷靜同發洩嘅方法。

11.跑步對你人生有沒有幫助/改變？

絕對係改變我好多，一個只有三分鐘熱度對事對人嘅我，「堅持」其實對於我嚟講係好難嘅事，特別可能係一啲唔係特別舒適嘅好難完成嘅任務。

以前嘅我係我好快就會放棄，但係因為我keep住都有跑步影相打卡，逐漸見到自己多咗好多做運動嘅朋友關注，大家係網上都會互相打氣，真係淨係講跑步嘅事，同埋身邊亦都有朋友message我話，真係因為見到我自律、堅持跑步，所以令到佢地都有呢個衝動開始做運動，我睇完真係真係真係好開心！ 原來我嘅努力堅持唔係單止影響我自己，係可以感染其他人，更加令我會繼續跑落去。

12.有什麼社交媒體可以找到你？

可以透過我IG或者小紅書搵到我呀😊
Instagram:man.md ；小紅書: 文荻Mandy

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/