吳浩康嘆生意難撈　日做幾份工捱到腳都腫

藝人吳浩康（Deep）日前在社交網公開向涉嫌拖數的「無良公司」追數，為免令旗下員工「有汗出無糧出」，先行自掏腰包墊支工資，同時向欠款公司發出8月30號凌晨為最後過數時間的通牒，事隔兩日，他「報喜」指「事情終於圓滿解決了，收返啲錢啦，多謝各位關心」。

他接受訪問時大叫好彩，指自己遇拖數的情況不算多：「我遇到好多貴人、好客戶，（有咩方法防止被拖數？）除咗唔做之外，無方法可防止，近年建造業寒冬，成個行業都唔夠嘢做，好靜。」雖然如此，但他着大家毋須擔心其生計，因工作陸續有來，可以接商演、廣告、教唱歌及擔任無綫《聲秀》歌唱大賽節目的導師，還籌備舉行個唱，他更補充謂：「仲有做湊仔公。」

問到他身兼多職可夠時間休息？他表示：「都夠嘅，依家有乜工作都做啦，趁自己仲有體力應付到。我想講喺《聲秀》有個後生仔好有潛質，又後生又高我成個頭，好想幫佢。 」又透露其追B夢依然未放棄，只要待太太調理好身體就再努力造人，他又說：「湊一個，同湊五個細路嘅辛苦程度都相差冇幾，所以想生多個bb嘅。」現年42歲的他覺得自己體力上仍可應付沉重工作量，不過身體最誠實，在社交網上載睇醫生短片，宣布腳部受傷，腳掌腫到多了隻「雞蛋」。

東網網站 : https://on.cc/東網Facebook專頁 : https://www.facebook.com/onccnews/