網路大數據話你知鄧紫棋點解評價會咁兩極！

G.E.M.評價差咁遠嘅？

呢排中港台娛樂圈咁熱門話題，梗係鄧紫棋啦！佢同合作多年嘅經紀公司「蜂鳥音樂」終止合約，搞到好多買咗票想睇鄧紫棋巡迴演會嘅人個心十五十六，日日F5睇新聞希望一切順利。鄧紫棋已經係歌壇天后，但你又知唔知，佢出道至今喺香港評價唔同嘅原因？今日DailyView網路溫度計透過網路大數據嘅調查，統計咗香港人對佢兩極嘅睇法。Let's start！

DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

image souce：IG/gem0816

一齊嚟睇吓網民點解咁唔鍾意佢啦

5 鄧紫棋杯葛叱咤樂壇頒獎禮

話說喺2012年，G.E.M.公布自己唔會出席商台嘅頒獎禮，喺Youtube上傳《G.E.M. 對香港頒獎禮的看法》批評埋香港各個頒獎典禮，咁當然引起好大嘅風波啦！唔少網友都批評佢自大、口是心非，即使事隔多年，都仍然有唔少人記得。

image source:IG/gem0816

4 公關災難，鄧紫棋俾人冷落

正所謂「做人無公關，食屎架啦！」G.E.M.喺呢方面，就真係做得麻麻啦，連前輩甄妮都公開數過佢無家教。最受網民恥笑嘅，要數佢喺新澤西開騷但竟然係咁大叫New York。唔怪得連校長譚詠麟都感嘆佢同傳媒關係太差啦！

image source:IG/gem0816

3 G.E.M.力數前度，太過小器

有人話佢真性情，但香港網民就多數話佢小器，嗱，G.E.M.前度林宥嘉分手之後，俾人訪問就話會祝福對方。但係鄧紫棋就係FB公開力數前度五宗罪，真係再見不再是朋友，之後雙人仲隔空用「新歡」暗寸舊愛，真係扣咗唔少形象分。

image source:IG/gem0816

2 G.E.M.成日得罪香港明星

鄧紫棋以前寫嘅Xanga俾人發現，仲揭露佢寸鄧麗音走音，話吳卓羲跳樓差，鬧胡杏兒「最肥最賤最樣衰最唔識做戲最乞人憎」，成為一時風波。2014年《明報》刊登佢嘅專訪，話香港樂壇要「徹底毀滅」喎！呢一句，真得得罪哂全世界㗎。

image source:IG/gem0816

1 鄧紫棋撰文力撐689

G.E.M.俾網友批評最多嘅，一定係佢公開表示支持上任香港特首689啦！佢叫市民唔好靠政府，要靠自己努力喎～哇，呢樣真係講就輕鬆，即刻俾巴絲打罵佢講風涼話，離鬼哂地，不過可能係講者無心，聽者有意，可能呢個就係大家唔鍾意佢嘅關鍵原因。

image source:IG/gem0816

點解佢嘅評價會咁兩極嘅？我哋又睇睇另一邊嘅睇法！

真係兩個極端啊！

分析完好多巴絲打嘅討論入面，鄧紫棋點解無咁受歡迎之後，我地用網路大數據統計埋歌迷嘅睇法，一齊睇睇邊五件事係令G.E.M.歌迷愛到佢死心塌地啦！

image souce:FB/鄧紫棋

5 鄧紫棋，真性情做自己

G.E.M.出道以嚟，成日都有負面新聞纏身，佢嘅回應方法一啲都唔偽人，反而係好真性情咁表達佢嘅感受。好似佢部紀錄片《一路逆風》咁，大膽咁講返自己同林宥嘉點解分手，網民就係鍾意佢毫不造作，仲話佢「不做作又親民 大方且對歌迷視如己出」㖭！

image source:Wiki

4 G.E.M.係實力「女神」派

鄧紫棋嘅外貌甜美，身材亦都非比尋常，由最初出道嘅可愛風，到而家嘅成熟性感，一直都受到大家嘅關注。Well，人係視覺嘅動物，有邊個唔鍾意睇靚女架？網民都係人，梗係鍾意外貌與實力並重嘅G.E.M.啦，仲有網民會稱佢為女神㖭啊！

image source:FB/一路逆風

3 真正嘅才女，鄧紫棋

做歌手，除咗唱得跳得，識唔識自己創作都好重要架。G.E.M.年紀輕輕，但多才多藝，作曲作詞對佢嚟講只係小菜一碟。好似佢首破億點擊嘅《光年之外》咁，作曲作詞都係佢一手包辦，甚至有網民話最鍾意佢呢個首歌，真係好勁啊！

image source:IG/gem0816

2 聽佢嘅歌都好感動啊

講到GEM又點可以冇提到《Where did U go》呢，好多香港歌迷都係因為呢首歌認識佢，仲有人留言話「如果我手機只能放一首歌，那一定是Where Did U Go。」。而後來佢上《我是歌手》演唱《泡沫》唔單止感動到好多現場觀眾之外，家庭觀眾都俾佢搞到塊臉都有兩行淚啊！

image source:Youtube/ GEMblog

1 G.E.M.喺知名唱歌節目有出色表現

鄧紫棋2014年開始參加大陸節目《我是歌手》，2018年參加《中國新說唱》，好多人都係佢喺因為節目入面唱《龍捲風》、《泡沫》而重新認識佢，令到佢事業更上一層樓，紅遍中港台三地。G.E.M.喺《我是歌手》得到總亞軍，又喺《中國新說唱》入面成為成為冠軍製作人，咁好成績，梗係吸引到好多網民討論佢啦～

image source:Youtube／芒果TV

分析說明：

本研究資料分析時間範圍為2018年03月10日至2019年03月09日，共一年。

網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『鄧紫棋評價大不同 』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。