超快中的超快 – Ferrari 812 Competizione

仲記得兩年前獲邀去珠海國際賽車場測試Ferrari 812 Superfast，剩係個名都話你知超快。而尋晚Ferrari基於812 Superfast 打造的嘅全新法拉利V12 特別版車型812 Competizione矚目登場，於全球直播當中，廠方公開限量999部嘅硬頂車型與限量599部嘅專屬Targa 車型。兩款車型同時搭載一副6.5升V12引擎，馬力高達830cv，峰值扭力達到692Nm，備有廠方最先進嘅PCV 虛擬短軸距3.0 系統，配合四輪獨立轉向。0-100km/h只需2.85秒，0-200km/h亦只需7.5秒，極速達到340km/h。經過重新設計嘅包括連桿、活塞、曲軸同燃油分配器在內嘅關鍵引擎部件， 令引擎最大轉速可高達9500rpm。相較鋼製連桿，鈦合金連桿減重40%，並確保相同嘅機械阻力。除咗呢啲改善措施外，曲軸經重新平衡調校，並較之前版本減重3%。

  兩款車雖然屬於同一系列，但外觀上都有多少分別，尤其Ferrari 812 Competizione以全鋁表面取代後車窗設計，而812 Competizione A採用嘅飛扶壁式設計項目與「葉片」造型所營造出嘅車頭箭頭設計完美呼應，為車身營造向前衝嘅視覺效果，同時賦予其與硬頂車型截然不同嘅造型格調。

812 Competizione同812 Competizione A官方售價為€499,000同€578,500，不過據代理表示，「Eligible customers 已經完成認購」，即係咩?即係已經無得賣囉。