整理自己 重新出發迎接2021

航空業大地震中，唔同嘅人都好似失去咗一啲嘢，而好多人喺2020都失去咗唔少。今次不如一齊學下有啲乜嘢方法可以與傷痛共處吖！

面對失去，我哋需要時間去消化整理，而喺呢個時間，可以試一試下面嘅方法，睇下可唔可以令自己好過一啲：

1. 容許自己傷痛😢

我哋經歷緊嘅係一個好特別嘅情況，絕對係唔尋常而且唔係小事，所以，我哋會傷痛，會有哀傷反應係正常不過嘅。呢份傷痛，源於我哋對工作、生活、社會同香港嘅熱愛。肯定自己嘅感受，比自己一啲空間同時間接觸返呢份傷痛，仲要有心理準備呢一份傷痛可能會時不時出現。

2. 建立生活新常態💫

疫情下嘅生活需要新常態，經歷失去之後嘅生活都需要新常態。可能我哋會好頹無曬心機，但係都總要的起心肝，調節作息時間，同埋搵下節目。一個固定嘅時間表可以令生活多返啲規律同目標，增加安全感，令個心定啲。唔知做乜嘢好？可以由一啲日常嘅小事、興趣、或者一啲曾經想做又無時間做嘅嘢開始，沖杯咖啡、整個早餐、湊阿仔/阿女返學放學、睇兩頁書都可以架！

3. 同失去講bye bye👋🏻

失去嘅經驗意味住我哋嘅生命會由一個階段過渡到另一個新階段。呢一個過渡需要一個同失去咗嘅嘢正式講聲bye bye嘅機會。情況就好似我哋畢業會行畢業典禮、轉工會farewell、結婚會搞婚禮一樣。呢一個bye bye係用行動比自己知失去咗嘅嘢已經係事實，準備自己迎接人生嘅新一章。至於做啲乜嘢就真係好視乎個人喜好喇，有人鐘意食返餐飯，搞返個party；有人鐘意自己靜靜哋影下相，懷緬過去；有人創意爆燈，整返件紀念品……總之各適其適，講到bye bye就得啦！

4. 搵人陪下呻下💬

傷痛係要搵人分擔嘅。搵個信得過嘅人陪下自己放下負，話比自己知：我唔係得一個人架！身邊仲有人支持同關心自己。如果大家信得過，吾係心理學家都好願意陪住大家一齊分擔失去帶嚟嘅傷痛架！

5. 化哀傷為動力💪🏻

失去帶嚟嘅傷痛，好多時候會成為我哋改變唔公平制度、幫助其他有相同經歷嘅人嘅動力。睇下航空業幾多人企埋同一陣線，為大家爭取合理待遇？除咗為自己，相信佢哋亦係為咗其他同行，同其他將會入行嘅後輩嘅福祉。同樣地，我哋都見到好多企業向機組人員伸出援手，可能係出於一份尊重，一份感激，一份守望相助嘅精神，亦都可能係因為曾幾何時經歷過失去工作嘅迷惘同徬徨……

或者都係時候，我哋都要做返啲嘢整理下自己嘅經驗喇！都係果句，講就容易，Work唔work就試過先至知喇！

吾係心理學家徵集一人一句打氣說話，為大家集集氣！🙌🏽

🔎想知多啲？睇下呢本書啦！
Wolfelt, A. D. & Duvall, K. J. (2010). Healing After Job Loss: 100 Practical Ideas. Companion Press.