跑步與人：Sylvana
跑步年資？為什麼開始跑步?
我會話大約兩三年，因為2023年我先開始有啲心機跑。我本身由細到大係打籃球嘅，跑步對於我嚟講係訓練體能嘅其中一項，我係唔鍾意跑步，訓練之中冇話對跑步要求有幾多，亦冇仔細去練。直到疫情開始行山，識到唔同山友，佢哋跑得好快，我成日都係死追，咁就開始焗住慢慢跑吓。去到疫情完嗰年，見到好多人玩實體賽好熱血，我就膽粗粗報咗第一個25km嘅山賽，咁就開始咗日常跑步嘅習慣。
有沒有跟跑會或教練練習？選擇原因？
冇。因為我返輪班工作，時間比較難遷就，但都試過有朋友邀請過去玩一兩次跑班，係開心嘅，學到嘢之餘，一班人一齊努力嘅感覺好好，再有機會都會想再跟，希望可以培養到好似大家咁有熱誠。
喜歡的跑步用品品牌？最喜歡的一對跑鞋？原因？
On、Hoka、New Balance。暫時嚟講我都係一個新手，冇話追成績追速度追里數，所以跑鞋嚟講都係追求舒服為主，我都幾滿意而家着緊嘅路跑鞋New balance Fresh Foam X 1080 V13/V14，鞋底舒服緩震都夠，仲有顏色都靚。
喜歡越野跑還是路跑？
一定係越野跑，上山樂趣多啲。
見你都有行山、滑雪 , 有沒有因為跑步而放棄了其他運動？或者其他運動會唔會對跑步有好處或影響？會點平衡？
我又冇特別因為跑步去放棄其他運動，因為我係個好好動嘅人，鍾意玩吓試吓唔同嘅運動，我諗要講放棄嘅話，應該係報咗山賽，比賽前嘅兩三個月會比較少啲打籃球，始終籃球比較衝撞性同埋跳躍性多，易傷易拗柴，唔想浪費咗山賽。
我都好鍾意滑雪，唔係好叻，但係都好有成就感，而滑雪訓練嘅平衡力及腿部唔同嘅細肌肉，對其他運動都好有幫助。
跑完步最想吃什麼？跑步聽什麼歌？
其實每次跑完步都冇乜胃口，唔會馬上食到嘢，反而係不斷都想飲嘢，爆汗完之後一定最想飲可樂。
多數路跑先聽歌，都係聽啲比較有節奏嘅歌，咩語言嘅歌都聽，保持住個新鮮感，好怕悶。
喜歡什麼時段跑步（晏跑/晚跑）？為什麼？
我比較鍾意有日光嘅時間跑步，多啲風景同顏色睇。
運動對人生或工作有沒有幫助/改變？
可能本身我唔係好鍾意跑步，但係我盡量搵方法去令自己習慣呢件事，接受培養，而家反而冇咁抗拒。所以無論生活定工作上遇上啲新嘗試，都會同自己講試咗先，過程會有得着。
運動令我嘅生活/工作比較有動力，有咗體能唔會成日覺得太攰，好多嘢都可以應付到。
想到外國跑馬拉松/越野賽嗎？如果是，會選擇那裏？
當然想，我會想去日本/歐洲，望住靚嘅風景跑真係好正。
作為女跑者，可以建議一些防曬或運動化妝秘訣給其他女跑者參考？
防曬就一定係戴帽帶太陽眼鏡，Hilx太陽眼鏡好多靚嘅顏色揀，襯衫襯帽必備。而運動化妝最主要都係搽防曬，我比較大汗，所以運動嘅時候真係化唔到啲咩妝，唔想塞毛孔生痘痘。不過Spococo嘅運動防曬粉底SPF20係真係好方便，透薄保濕，又有少少遮瑕，令皮膚有返啲光澤，皮膚冇咁易有疲態。如果係喺曬到燶嘅天氣下，我會輕輕搽多層高防曬度數嘅防曬相係底，或者用Spococo透明高效運動防曬乳（SPF50）。
什麼社交媒體可以找到你？
IG & Thread: namb_explore
Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/