【潛龍碟影】被過度神化的社會劇

原文章連結：https://bit.ly/4j9i7jb

近排熱到不能再熱嘅Netflix劇《混沌少年時》(Adolescence)，網上鋪天蓋地嘅劇評同群組討論，紅到不得了，不過奇怪嘅係，評價都幾兩極，差不多有7:3比，大概有三成人留言話悶到訓著。不過其中七成人有3點係讚到上天嘅，包括每一集50分鐘全部「一鏡到底」嘅拍攝手法；15歲小演員Owen Cooper處男拍劇被封天才少年；探討青少年、家庭種種社會問題等等。

.
龍叔叔當然有煲，全劇得4集好快睇完，先上結論：只值7/10分，龍叔叔就係不太喜歡的三成人之一。首先所謂一鏡到底，的確睇到編導演嘅合拍同功力，係有一氣呵成嘅感覺，之不過係咪必需嘅呢？
一鏡到底限制左場景嘅轉換，變成由A走去B就要塞一堆步行同對白，首2集還算有新鮮感，但4集都係咁不停跟住角色周圍走，旁人又一直碎碎念，點得黎咁多精采對白丫？喺對白疲勞轟炸下，好易令人悶到訓著。
.
第二點關於Owen Cooper飾演嘅問題少年Jamie，的確係處處流露天才味道，純真外貌下隱含邪氣，確實無得彈，呢點龍叔叔堅係畀Like的，奧斯卡金球嗰啲必有一席位。
.
第三點關於劇情，甚麼社會、家庭、學校甚至殺人問題，編劇並沒藏頭露尾，一早話左劇情係咁就咁，唔好期望有咩扭穚反轉劇情之類。對唔住，龍叔叔唔係住喺英國，亦無小朋友，對呢套戲嘅感染力實在大大減低，細節位係睇到親情之類，不過去到第3、4集真係幾麻木，去到想快啲煲完嘅地步。
.
最後，見到全世界也在吹捧到上天嘅氛圍，見群組上好多表達不喜歡嘅人都被冠以唔識貨之名，又強調咩一鏡到底有幾勁，近乎唔睇正白癡唔識睇戲咁滯，呢點龍叔叔真係不敢苟同。
需知電影同劇集都係好主觀嘅載體，鍾意就鍾意，唔好逼我認同有幾勁，正如幾個單位都有邀請龍叔叔睇《哪吒2》一樣，不過So9rry，無興趣喎。
.
#混沌少年時 #Adolescence #Owen_Cooper #龍叔叔