周國賢宣布加盟英皇　出帖介紹新歌竟擺烏龍

周國賢（Endy）宣佈加盟英皇娛樂，結束近5年的「獨立廠牌」生涯。Endy昨晚（1月22日）在社交平台發帖文介紹全新派台歌《大個要做個好人》，但疑似直接將同事發給他的「出post schedule指引」直接複製在帖文：「“大個要做個好人" - Social Media Posting Schedule　Post 1，今晚　發布時間:1月22日 22:00　發佈平台：Endy Instagram (@koholaendy)　caption : 23.1.2026　12:00 | 叱咤樂壇首播　13:00 | 各大音樂平台及MV上架」。

有網民在社交平台分享截圖並寫道：「究竟小編有幾唔睇內容，原文照copy然後post出街，定係新宣傳方式，等大家留意周仔加盟新公司第一首歌」。亦有不少歌迷在Endy的出錯帖文下留言：「請多啲share你嘅Schedule」、「字都唔改直出」、「周仔好可愛，笑死我」、「是gimmick嗎」……Endy之後將帖文改回「正常」版本，他在IG Story出帖：「好啦好啦唔玩啦改言正經啲」，又笑903的帖文：「喂！個cap唇做乜扮我？」。

Endy由單打獨鬥轉為簽約唱片公司，他指其實公司兩年前已開始跟他談合作，而最終打動他的，是一個十分實際的問題：時間！Endy坦言過去幾年自己做獨立公司雖然自由度高，可以任性做《百鬼夜行》這類不理市場的音樂，但所有事情都一腳踢，由創作、拍MV、剪片到出糧計數都要處理，根本沒時間專心寫歌，「講真都四十幾歲，時間過得好快。」Endy表示公司只要他專注創作，「其他嘢公司全力配合，呢樣正正係而家最需要嘅。」當然，人亦是主要因素，「公司有我十年前嘅舊拍檔，當年一齊打造『有時三部曲』呢個經典系列。仲有好多識咗好多年嘅老朋友喺度，令我更加安心。」

加入新公司，Endy笑言自己是「細路仔」。「早排同洪卓立傾偈，我話而家我係小朋友，佢話：『係呀，你要叫我師兄㗎。』哈哈！」至於最想跟公司哪位歌手合作，Endy就話個個都想，「因為霆鋒、祖、Kenny、小巧，大家都識咗好多年，以前都幫佢哋寫過歌，期待同所有朋友仔合作。」

Endy直言今年目標想當試做回十年前的「多產年代」，想推出8至10首歌，然後推出一張完整大碟，再開show，「承認呢個想法『好老套』，但作為一個經歷過Analog（模擬）時代嘅音樂人，我依然深信一張完整專輯有不可取代嘅魅力同重要性，係誠實記錄自己想法同情緒嘅方式。」Endy亦透露一直想拍電影，加盟公司亦因為知道公司熱衷電影製作，相信會有更多機會，更自爆，「而家其實都有部電影溝通緊，可能夏天開拍，自己都好期待。」

全新派台作《大個要做個好人》，由Endy親自作曲、林若寧填詞，充滿英式搖滾風格。歌曲是對現今社會一種「做好人競賽」現象的反思，世界彷彿要求人人捐款要多、讓座要快、OT要通宵，猶如競逐「好人獎狀」。Endy跟林若寧希望透過歌曲，帶大家回到可以「搗蛋」的年紀，狂想一下。與其盲目跟從世界定義怎樣才叫「大個要做好人」，其實我們更需要成為忠於自己的人。