唔想被黑名單就要睇 「扮工室」十大最難頂嘅同事行為
「扮工室」十大禁忌
人一生有三分之一時間都係返緊工，所以一個好嘅工作環境真係十分之重要㗎。有人話返工就係出賣自己靈魂，但如果有好同事可以carry吓你就當然最好啦，若然無，都至少希望對方唔係一個豬隊友。DailyView今日用網路大數據調查咗呢十樣職場同事最難頂嘅行為，坐你隔離嗰個有無中呢？
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 人前人後兩個款
俗語都有話：「唔怕真小人，最怕偽君子」，相信大家由細到大都一定遇過唔少雙面人，特別係喺公司呢個是非之地，就算唔勾心鬥角，一旦牽涉到自己，好多人都會變得自私。無論係平時生活上定工作上，最怕就係人前同你好熟咁，轉個頭走去講你壞話，甚至督你背脊。明明睇穿佢，揭穿又怕大家尷尬，唯有當笑話睇佢表演吓演技啦。
image source:Youtube/TVB Network Vision (Official)
9 擦鞋博上位
出到嚟社會，喺公司入面難免有好明顯嘅階級觀念，對住高過自己職位嘅高層，即使你睇佢唔順眼，唔多唔少都要恭恭敬敬，相處嘅時候要特別注意。不過唔少人為咗討好老闆，唔理三七二十一都奉承咗先。其實人哋無錯嘅，若然老闆係受呢一套，放低尊嚴氹得老闆開心，日子應該會好過D，不過就難為身邊人忍受呢種咁假嘅行為囉。
image source:Youtube/GQ TV Taiwan
8 當年勇無限loop
逢親同老一輩講起D咩，一同佢地唱反調，佢哋就會話：「我食鹽多過你食米啦！」每次聽到都真係幾炆，雖然以前經驗係好值得我哋學習同參考，不過成日提住自己當年又有咩用呀，開口埋口都只可以講自己以前點，倒返轉嚟睇都表示你依家停滯不前。時代一直進步，人要向前看，唔肯接受新事物遲早被淘汰㗎。唔好留戀過去，面對現實罷啦！
image source:Youtube/MV Production HK
7 無EQ 亂發脾氣
返工難免遇到唔順利嘅事，每個人都有自己情緒，可能有時會控制唔住自己，一次半次都可以體諒吓。不過有小部分人就唔會理人感受，隨便發脾氣發洩情緒喺人地身上，小編自己就試過遇到一個上司成日突然大聲對合作廠商發脾氣，作為上司，咁大個人都咁失控，其實都幾失禮㗎，不過當然佢本人可能唔覺得影響到自己形象又印象到人掛。
image source:Youtube/TVB USA Official
6 是非當人情
個個人都有秘密，或者唔想公開宣揚嘅事，通常講得比對方知，都因為對佢有一定信任，而保守秘密就係對方嘅義務同責任。一日咁多時間喺公司度過，間唔中傾吓計講到自己嘅事、或者將你同佢講嘅嘢周圍唱，用呢D是非同其他人打好關係、作為同其他人討論嘅話題，就好唔要得喇。所以點解咁多人話係職場要特別帶眼識人、唔好隨便相信人，都唔係無原因。
image source:YouTube/ TVB (official)
5 無禮貌又唔尊重
呢一點相信喺咩場合都一樣好重要，尊重人係最基本嘅禮貌，不過好多人出嚟做好多年野，都一樣學唔識。返工同同事之間少不免有好多溝通、合作去完成，有時都可能要麻煩人哋幫手，但有D人就當做老奉咁，遇到呢D人真係谷鬼氣。為咗唔好拉低自己水平，都只可以深呼吸，冷靜吓，正所謂「忍一時平浪靜，退一步海闊天空」呀。
image source:Youtube/ TVB USA Official
4 職場性騷擾
職場性騷擾係呢個排行入面最唔可以接受嘅事！其他事都可以同自己講算啦，返工姐，忍吓啦，但性騷擾真係唔可以算數。依家呢個年代，唔一定女仔先會比人性騷擾，無論男女，遇到呢D事都一定要做出反擊。小則言語上講低俗笑話、嚴重到落埋手，即使只係言語，只要令人感到唔舒服，都係屬於性騷擾㗎。大家要好好保護自己，工無咗可以再搵，但絕對唔可以姑息呢D人呀！
image source:Youtube/TVB USA Official
3 拖字闕
返學有小組功課嘅時候，一定會有Free Rider同永遠都遲幾拍交嘢嘅同學，出到社會，呢D人好多都繼續保持呢個做事方式，永遠都押底線先交野、甚至遲交，完全意識唔到、又或者唔介意自己成日麻煩到人。雖然一般喺限期內交到貨，即使遲少少都無咩太大問題，但而往往呢D小細節通常都會成為大家評價你嘅重要因素，所以大家請自重啦。
image source:Youtube/ TVB USA Official
2 側側膊 卸膊唔多覺
唔好以為大家都係大人，就有返咁上吓嘅承擔，有D人真係天生好叻講大話、推卸責任。每當有發生咩事，第一時間劃分楚河漢界、最緊要同自己撇清關係。唔知大家有無聽過2013年一套舞台劇入面嘅「職場卸膊操」，入面歌詞道盡唔同階層打工仔心聲，其中一句：「呢單嘢唔係我跟開」就正正係推卸責任嘅經典例子。衝出嚟邀功，有難又唔同當，唔理你係高層定一般打工仔，都唔方受歡迎。
image source:Youtube/TVB USA Official
1 真傻豬定扮天真
唔係性別歧視，不過呢一件事又真係特別常發生喺女仔身上。你身邊總會出現過一D扮天真扮傻嘅女仔，乜都唔知，乜都要人幫手。見到真係想連環翻佢十個白眼，再叫佢收起把高頻度娃娃音。唔好以為佢哋只會用呢種手法對付男仔，習慣成自然，加上要呃人先要呃自己，好多時候對著全世界都用同一種方法。如果純粹希望有人幫吓手都算，但有D豬隊友，阻住大家做嘢，若然你身邊有呢D人，真係祝君安好啦。
image source:YouTube/ TVB USA Official
分析說明：
本研究資料由《KEYPO大數據關鍵引擎》提供，分析時間範圍為2019年05月10日至2019年08月07日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『職場同事最難頂嘅行為』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。