父親節第一個慶祝活動！林盛斌慘做阿四買早餐

今日雖然係父親節，但「多仔公」林盛斌（Bob）一早就要做阿四，為3個仔女買早餐！

佢喺社交網呻話：「父親節第一個慶祝活動，就係出去買早餐俾（畀）佢哋………..好開心呀真係！😒😒😒」唔少網民都笑言「我知你開心的」、「唔該晒辛苦晒😂」、「應該係好開心😂因為係幸福」，而一班星爸陳山聰、楊潮凱都留言祝佢父親節快樂！

其實阿Bob都唔只一次呢啲重要日子要去買早餐，好似有次打8號風球佢都要出動，風雨不改呀！

而同係有3個細路嘅黃祥興都買埋一份，仲話：「父親節一起身，安排佢哋嘅早餐 ，你（林盛斌）講得啱係真心開心…🤭各位爸爸父親節快樂！」不過仔女就畫咗畫送畀佢，唔知Bob有冇收到咩回禮呢？

東網網站 : https://on.cc/

東網Facebook專頁 : https://www.facebook.com/onccnews/