社交距離

限聚令實行咗咁耐，農曆新年又就快到，唔知大家有無心癢癢，好想出下街，同朋友聚會呢？
唔使驚喎，《吾係心理學家》又出唔到告票嘅。 從公共衛生/傳染病防控嘅角度，其實我哋都好清楚，一班專家/官員都係為大家好，想盡快控制疫情。

之但係點解我哋又咁唔聽話？唔通我哋真係太過年輕叛逆？

「因為社交有利人類生存！ 」
人類與生俱來就識得同身邊嘅人交流互動，未識講嘢嘅BB仔肚餓/唔舒服會喊，因為佢哋無能力照顧自己，要搵爸爸媽媽幫手；人類嘅祖先傾向群居，因為有危險嗰時大家有個照應，必要時搵班烈士犧牲自己救全族；人類會互相分享經驗知識，因為咁樣慳水慳力，唔使重複犯錯。

「因為人類有情感需要！ 」

除咗生存，人類仲有情感需要。心理學中嘅經典Maslow’s Hierarchy of Needs 話我哋知，人有5個層次嘅需求，而喺大家都滿足咗生存嘅需要(姐係食得飽、著得暖，又有瓦遮頭)同安全嘅需要(姐係無咩會威脅到你嘅性命財產)，就會開始social下，著重人同人之間嘅關係，建立屬於自己嘅群體。

「因為群體可以幫我哋建立身份！ 」

人類喺唔同嘅群體中有唔同嘅身份，喺屋企係個百厭仔/女，或者廿四孝阿爸/阿媽；喺朋友圈中，可以係開心果，可以係聆聽者，可以係百寶袋；喺工作圈中，可能係型英帥上司，可能係經驗老到嘅old seafood，可能係勤力過隻牛嘅小薯……
疫情之下，減少社交，在家工作，連帶呢啲身份都唔知點解好似有啲模糊，我哋自然想重出江湖，搵番啲身份啦！

「因為我哋覺得不安！ 」

係呀，就係為咗一份安全感。疫情咁嚴峻，威脅我哋嘅健康，甚至人類嘅生存，實在令大家好擔心，好不安！橫掂都係，與其一個人匿埋驚，不如搵啱channel嘅人一齊驚？一人計短二人計長吖嘛，係咪先？
有研究搵到原來同有共鳴嘅人一齊擔心，係會降低壓力荷爾蒙皮質醇架！ 所以呢，大家好想出街，好想約朋友，明嘅明嘅。不過唔係叫大家違反限聚令喎！一齊諗下抗疫之餘點樣可以維持社交，等自己身心都健康？

想知多啲，可以睇吓呢篇文：
Hopkins, N., & Reicher, S. (2016). The psychology of health and well-being in mass gatherings: A review and a research agenda. Journal of epidemiology and global health, 6(2), 49-57.

記得follow埋我哋ig呀(@hkhipsychologist)！