m18講場：港交所搞「金鑼巡禮」　有咩地方可打卡？

香港交易所(00388)周五(20日)起，一連兩星期輪流在本港9個地方，舉行「金鑼巡禮」活動，將平時上市敲鑼儀式用嘅金鑼，帶落社區，畀市民及遊客打卡，同時可以著下「紅衫仔」，一嘗扮演80年代交易員嘅滋味。

主席唐家成就話，敲鑼儀式歷史悠久，上世紀90年代初已開始，具有重要嘅代表性，市民亦認得有鑼就有上市，所以認為金鑼最能夠代表香港金融市場。

佢相信，好多香港市民好少機會接觸到金鑼真身，可能都未摸過，最多喺電視睇過，或報紙見過，所以希望藉住25周年，舉辦一個巡展，走入社區，令全港市民都能夠親身感受到平時上市敲鑼儀式，體驗香港國際中心的活力，話唔定會令更多企業上市添！