馮允謙推出全創作英文情歌 稱歌名表明一切

馮允謙（Jay Fung）推出親自作曲填詞並與周錫漢聯手監製的英文情歌《She Don't Love Me Anymore》，他表示新歌對自己非常有意義，歌名表明一切。

MV由吳詠琪導演執導，Jay在草地上自彈自唱，再帶着結他步行到沙灘，其間遇上牛群以及前來滑浪和放狗的人。由於MV採用一鏡到底拍攝，團隊每次需待人群散去才能繼續拍攝。Jay說：「入行到依家都好少用一Take模式拍MV，好特別都好快拍完，不過都拍咗10幾個Take，因為每一Take都有嘢要調節。估唔到7點已經好多人喺海灘，有好多牛，又有狗仔，又要捕捉個天色，想有太陽又唔想太光，因為想Moody啲Match番首歌。」

拍攝期間，Jay險被地上的植物絆倒，他立即執生自轉一圈穩住腳步，絲毫沒有露出不安表情，獲團隊大讚轉得自然。他笑說：「我平衡唔係咁好，就嚟仆嘅時候好自然轉咗一圈。我以為會有啲奇怪，但睇番覺得個轉都幾好睇，跟住下一Take再做番個轉，有啲嘢就係唔覺意撞出嚟，覺得啱就用。」

比起平日官仔骨骨的王子形象，Jay罕以鬚根頹廢造型示人，更貼近MV的悲情氛圍。他說：「本身冇諗住留鬚，但呢首歌比較Sad，頹廢啲嘅造型好適合今次MV。唔係工作嘅時候我都唔鍾意剃鬚，亦有諗過留鬚，如果你哋覺得好睇記得講，咁我就可以留多啲鬚。」

Jay透露今年計劃推出不同語言的歌曲，率先推出英文歌《She Don't Love Me Anymore》。他說：「英文歌會繼續寫，如果大家覺得隻歌好聽就Share多啲、聽多啲，咁我就有多啲機會出唔同語言嘅歌。」

（即時娛樂）