我情敵係大小姐！Mandy摑到大小姐臉都紅埋，經歷誤會後蓮輝、博香感情更進一步～
如果自己最心愛嘅嘢俾人搶走，你會有咩反應呢？喺《愛回家之開心速遞》入面，Mandy一向都好順從大小姐，平時大小姐話一佢都唔夠膽話二！但係如果大小姐要搶走佢最愛嘅博士，Mandy幾大都同大小姐死過！為咗呢段咁難先得到嘅愛情，佢仲要超突破地掌摑大小姐！
「我情敵係大小姐」分咗上、下兩集，噚晚嗰集就講到Mandy聽到大小姐同博士有啲唔對路，以為大小姐利用金錢去利誘博士出賣肉體，令到佢一開始就向Rebecca哭訴～
Mandy一心以為博士為咗搵錢而犧牲色相，所以就好嬲大小姐！當大小姐見到Mandy有個Channel新款手袋，想問佢借嚟用嘅時候，Mandy竟然一反常態地拒絕大小姐嘅要求，仲話「點解你成日要搶走我啲嘢？」，吓吓都搏嘴！
其實大小姐同博士一啲私情都冇，只係因為博士無意中發現咗大小姐同送水輝嘅地下情，呢段感情少一個人知道就越安全，所以先要博士幫手掩護～
飲醉咗嘅大小姐仲要自曝：「宋太搞宋生有咩問題喎～」
博士知道咗佢地嘅戀情之後，就話自己最憎人地挖苦佢、笑佢係送貨仔、笑佢窮！所以大小姐之後勁誠懇同博士道歉，大小姐一直都唔會主動承認自己嘅過錯，亦好少會向其他人低頭，但係為咗呢段感情，大小姐甘願放低身段，改變自己～
大小姐為咗「輝蓮戀」而向博士認錯，講到自己同送水輝都眼濕濕！
為咗尋找真相嘅Mandy決定追去搵真相，怒上心頭之際仲一巴車埋去大小姐塊臉度，啪一聲連臉都紅埋！
Mandy知道自己打錯大小姐之後就下跪求饒～
今集入面「輝蓮」Sweet到震嘅互動都唔少！送水輝仲要勁Sweet咁話：「喺我心目中，你永遠都係最靚㗎！」，真係放閃無極限⋯⋯
最尾結局係兩Pair一齊攬住笑得勁開心，真係睇到小編都忍唔住露出姨母微笑！
以後大小姐同送水輝有Mandy＋博士幫手掩護，大小姐又唔會再阻止Mandy同博士嘅戀情，絕對係雙贏呀！
Text：Girls Editorial
Photo Source：TVB