Anson Lo新MV半晚過30萬Views 黃偉文解構「熬屋」有分歧

MIRROR成員Anson Lo(盧瀚霆)昨晚出新曲〈Megahit〉MV，只是上戴半晚已經超過30萬Views，而且MV更有超豪華陣容參演，包括阿Dee、鄭欣宜、鄭中基等。不過，除了這些亮點，原來還有黃偉文(Wyman)填詞，他昨晚就在IG出長文，表示這是「近10年最難寫嘅作品」，當中更因「熬屋熬屋熬屋」和Anson Lo有意見分歧。

Wyman口中的「熬屋熬屋熬屋」即是歌中的「Uh-Oh Uh-Oh Uh-Oh」，他就因為這些英文像聲字的限制而問監製和Anson Lo意見，最後因為「教主」回覆：「如果keep得晒，排舞會好排啲得意啲，隻舞出嚟一定會好睇好多喎。」而心軟，完成這歌詞，最後似乎都相當滿意：「好彩keep晒啲像聲字 #如果唔係點會有熬屋熬屋熬屋呢個咁得意嘅食鬼手勢」

Wyman全文
「一齊跟住唱返句「熬屋熬屋熬屋」先（做埋手勢呀吓）！
好吧，應承了，就要講解（長文慎入）：
為什麼我會說Megahit是近10年最難填的歌詞呢？（你估唔到居然係呢首呢？）
這首歌難，不是因為字數又多又密（係難，但跳舞歌係咁都好常見，時間同心機嚟嘅啫），而是因為technical層面的一些「天險」。
最主要的困難是demo裏原有的英文「像聲字」出現得特別頻繁，簡直分佈在全曲各個重要位置，仿彿有好多塊不能移動的大石頭，「分割」「撕碎」了整個地盤，但你還得在上面建出藝術品級的大廈，又要漂亮又要實用，和原有的「古蹟」最好互相融合得渾然天成。
先講理論上應該最hooky的C段，Boom Boom Boom只得四粒音之後就是Bang Bang Bang，換言之，填詞人只得四個字把這兩組像聲字有意思地連貫起來（還未說到那些散佈世界各地五步一樓十步一閣的Uh-Oh Uh-Oh Uh-Oh和口哨聲），即是說，詞人「可填」的地方很少，又要保存像聲字在它們原有天然的位置而又要make sense，已是一種難度。中英不斷轉換時，還要發音順口意思流暢。
另一方面，為了聆聽者的「順耳」感覺，（以便有助流行，從而成為真正的Megahit哈哈），那幾個有像聲字或ad-lib的段落也被局限了押韻（例如為了好聽啲，Uh-Oh Uh-Oh Uh-Oh 要盡量押個「好」「高」的韻，Bang Bang Bang最接近的粵音韻腳我覺得是「想」「央」，係呀為咗效果好，中英都要互相rhyme聽起嚟先爽㗎），所以先天這首歌「不能動」的限制就多多，當然，歌詞的構思、趣味、文法、佈局等等「基本」也是不能妥協的。
曾經問過監製同歌手本人：「填咗詞幾廿年，唔使講我梗係明keep到所有Boom同Bang會上腦好多啦，但係咁樣可能會令中文部份好肢離破碎㗎噃……咁所以呢，唔keep晒所有像聲部份得唔得，保留到嘅盡量保留，但係留返個彈性比我，必要時唔要一啲，填埋廣東話，就易寫好多，story-telling方面又無咁多限制，咁又好唔好？」
教主真誠回覆：「但如果keep得晒，排舞會好排啲得意啲，隻舞出嚟一定會好睇好多喎。」
於是，我又心軟了，想滿足晒佢所有願望，就辛苦啲都keep晒所有Boom Boom Bang Bang了（唔只咁，一不做二不休，去盡啲，送多個「乒鈴嘭唥」比你賀賀佢𠻹）！
不敢說成果怎樣怎樣，但都盡力了，希望大家喜歡這個通過「碰撞」而產生進步產生愛的故事，無論在歌裏歌外。

#好彩keep晒啲像聲字
#如果唔係點會有熬屋熬屋熬屋呢個咁得意嘅食鬼手勢
#熬屋熬屋熬屋
#Megahit
#追求更好就是要在別人可能忽略的細節上用功用功用功
#講呢啲填詞technical嘢係咪好悶」