【暖心空姐】記者於香港機場吃飯 埋單時發現空姐已幫忙結帳

近日香港國際機場有多場市民集會，不少傳媒記者也有到場採訪報導。一名記者在Facebook分享一段暖心的經歷，表示自己與攝影同事在譚仔三哥吃飯兼買外賣結帳時，發現有空姐已經為他們埋單，離開餐廳時更有顧客為他們打氣，令他感嘆「香港人可以有幾痴線」。

記者在Facebook寫道：

究竟香港人可以有幾痴線？

今日在機場做嘢，同攝記同事去咗譚仔食飯，兼買外賣畀同事食。食到咁上下，譚仔阿姐走埋嚟擺低張單話：「你哋張單，頭先坐喺嗰邊個空姐埋咗，叫我佢走咗先同你哋講。」

以上呢段說話，我反覆問咗阿姐幾次，先組織到完整意思係咁，一來阿姐的譚仔話真係好純正，二來我真係唔敢相信，今時今日嘅香港，竟然會有咁樣嘅事發生喺我身上。

我同攝記O晒嘴對望咗陣，定過神望望身上件反光衣，終於估到點解會咁樣樣，之後嘅對話大概都係圍繞「香港人真係CLS」之類。我仲豪叫多咗個蒜泥白肉同凍檸茶，結果張單畀人埋咗。

我哋講下講下，隔離檯仲對住我哋微笑，臨走講咗聲加油同小心，嚇到我在佢哋真係走咗之後，除低咗件反光衣收返入袋度先。

近兩個月可能係N年來香港記者最有光環嘅時刻，光環大到連至理名言「光環唔可以當飯食」都可以打破，真係好令人震驚。

btw，記者雖然窮，但都係返份工有糧出，都有預錢食飯嘅。知道好多人因為香港近日嘅事，份工都無埋甚至主動唔做，朝不保夕飯都未必有得食，有心有力嘅話，不如幫下佢哋啦。

不少網民也留言表示感謝記者、機場的工作人員令他們感到很溫暖。

+4

+3

↑點擊圖片放大↑

來源：Facebook專頁@記你老母