卡塔爾特集｜球迷村電動板車自由行，Hayya Hayya

卡塔爾世界盃日記 Day8

輪到摩洛哥爆冷擊敗巨人比利時，非洲代表出線在望

日本上場守出個未來，今場反被對手守出個未來

今日發生咗一宗災難，簡直係世界末日級：唔見電話！話說今日全日留喺球迷村睇波，睇到最後一場西班牙德國大戰，坐咗喺大銀幕前面啲豆豆梳化度。睇到最後15分鐘，電話冇晒電，由於戰情如火如荼，我就隨手將部機放喺側邊嘅枱仔上。都係自己大意之過，散場時漏低咗。行到返方艙冇耐就發現冇咗電話，即時折返睇波地點，但係已經搵唔番，前後不過15分鐘。

唔見電話有三樣嘢最麻煩，首先係Hayya卡（入境、入球場以至搭地鐵必須出示）同球賽e-ticket都儲存喺App入面，雖然幸好有部士啤電話，但原機未logout，新機都login唔到，要去票務中心搞。其次係唔見埋香港張SIM卡，張卡係用嚟keep住個WhatsApp嘅，仲有收銀行短信，但我短期內都唔會返香港。仲有就係，嚟到影嘅相全部冇晒！！

介紹番：左上角個QR Code，出入境同每次外出搭地鐵都必須出示。右上角嗰格一click會顯示已購買嘅e-tickets，但入場仲需要一樣嘢：比賽當日會收到另一個QR Code，要憑呢個Code先可以順利通行。個App仲有交通指引，教你點樣由身處嘅地方前往球場，另外又有世界盃期間每日活動指南同景點介紹。

今次又買教訓。原本今日影咗唔少靚相，係摩洛哥球迷勝利歸來，衝上台度慶祝嘅情景，不過啲相冇晒嘞，得番一段片我傳咗畀港婦，得以保留。

喺呢度介紹埋球迷村嘅一個玩意。開波之前我同港婦玩咗一陣電動滑板車，喺球迷村有唔少滑板車，方便住客往來地鐵（Metro）站，因為地鐵站話遠唔遠，但話近都唔近，大概步行六、七分鐘，最攞命係要穿過一片無瓦遮頭嘅大空地。

電動滑板車當然係收費嘅，而且因為住客都係日頭外出、夜晚返來，所以過咗中午村裡面啲車就會俾人揸晒去地鐵站，而外出太夜返嘅話地鐵站啲車又會俾人揸晒返村。今日港婦入夜之後想喺村玩下呢架嘢，咁啱又有車，就喺方艙周邊戰戰兢兢咁兜嚟兜去。警告：板車無眼，路人勿近！識港婦嘅人都知佢強項，試過連單車衝落河，你就知佢咩料啦。

是日賽果：

日本 0:1 哥斯達黎加

比利時 0:2 摩洛哥

克羅地亞 4:1 加拿大

西班牙 1:1 德國

by港佬

港婦漂流：

https://www.facebook.com/profile.php?id=100086404281791&mibextid=LQQJ4d

https://www.youtube.com/@kennis.chiangmai

Ig: @kennis.chiangmai