曾傲棐六年磨一劍　沿用中學時作曲存貨打造新歌：想同放榜生講聲加油

Arvin曾傲棐今日（8日）推出第二首派台歌《心の進化藥》，今次首次挑戰作曲，更原來是「六年磨一劍」，副歌部分是他中學時期的「陳年存貨」，直到今年先跟音樂人恭碩良（Jun）一齊砌埋verse同bridge，結果成功誕生，相當熱血！

Arvin自爆創作靈感隨心，「當初開始寫呢隻歌嘅靈感係，突然覺得身邊好多事都好值得講一聲多謝，就寫低咗副歌。」新歌走輕快節奏曲風，原來是想趁放榜季為應屆考生打氣。「同Oscar（填詞人）講想做一隻勵志歌，提醒大家照顧好自己先，慢慢行落去。」首次作曲過關，被問到下次會否填詞，Arvin笑說：「下次可能會試填詞㗎，不過我啲文筆仲要修煉吓！」

繼上次《時間的碎片》後，Arvin除了再邀來恭碩良（Jun）為新歌監製，這次更一起創作，「有好直接嘅火花衝擊。自己唔係一個特別對創作有信心嘅人，有一位咁有經驗嘅音樂人循循善誘去一齊做一隻歌出嚟，我覺得係一個不可多得嘅經驗。」

6月時，Arvin到日本旅居一個月，提到難忘事，原來又跟Jun有關，「喺日本當地做咗一隻歌嘅Mixing同埋Mastering。因為下一隻歌當初寫嘅時候已經好想做一隻有啲動漫風、JRock元素的作品。同埋阿Jun又畀咗個好大嘅驚喜我，幫我彈lead guitar嘅Dale，好驚喜咁出現咗喺東京嘅錄音室，我諗呢個都算係我人生中最難忘嘅初見。」